Türkmenistanyň hokkeý boýunça ýygyndysy üçünji diwizionyň «A» toparynda çykyş edip, dünýä çempionatynyň başlangyç oýnunda Bosniýa we Gersegowinanyň toparyny 3:1 (1:1, 0:0, 2:0) hasaby bilen ýeňdi.
Duşuşyk Stambulda geçirildi. Türkmen ýygyndysynyň hatarynda şaýbalary Musa Annasaparow (5-nji minutda), Kerwen Baýlyýew (47) we Döwlet Hydyrow (50) dagy geçirdiler.
Ýaryşyň oýun gününiň beýleki duşuşyklarynda Gyrgyzystanyň ýygyndysy Günorta Afrika Respublikasynyň toparyny ýeňdi (5:2), ýaryşyň meýdança eýeleri bolan türkler bolsa Lýuksemburgyň ýygyndysyndan üstün çykdylar (7:1).
Üçünji diwizionyň «A» toparynyň ýaryşy 21-27-nji aprel aralygynda Stambulda geçirilýär. Ýaryşa alty topar gatnaşýar: Türkmenistan, Bosniýa we Gersegowina, Günorta Afrika Respublikasy, Lýuksemburg, Gyrgyzystan we Türkiýe.
Ylýas Weliýewiň şägirtleriniň indiki oýny 22-nji aprelde Türkiýäniň ýygyndysyna garşy geçiriler. Duşuşyk Aşgabat wagty bilen sagat 22:00-da başlanar. Soňra türkmen topary Lýuksemburgyň (24-nji aprelde), Gyrgyzystanyň (25-nji aprelde) we Günorta Afrika Respublikasynyň (27 aprelde) ýygyndylary bilen oýnar.
