Aşgabatda Türkmenistanyň Prezidenti bilen Gruziýanyň Premýer-ministriniň arasynda gepleşikler geçirildi, Halk Maslahatynyň Başlygy «Euronews» teleýaýlymyna interwýu berdi, Eýranyň Prezidenti mukaddes Oraza aýynyň ýetip gelmegi bilen Türkmenistanyň halkyny gutlady we beýleki habarlar
Türkmenistanda
1. Türkmenistanyň Prezidenti Serdar Berdimuhamedow türkmen gelin-gyzlaryny Halkara zenanlar güni bilen gutlady. Türkmen zenany maşgalanyň sütünidir, ahlak gözelliginiň nusgasydyr, öý-ojaklarymyzyň ýaraşygydyr. Zenanlara sarpa goýmak, olaryň mertebesini belent tutmak gözbaşyny müňýyllyklardan alyp gaýdýan milli ýörelgelerimiz bolup durýar diýip, döwlet Baştutany Gutlagynda belleýär.
2. Türkmenistanyň Prezidenti Serdar Berdimuhamedowyň hem-de Gruziýanyň Premýer-ministri Irakliý Kobahidze Aşgabatda geçirilen duşuşykda hyzmatdaşlygyň meselelerini ara alyp maslahatlaşdylar. Bellenilişi ýaly, däp bolan dostlukly türkmen-gruzin gatnaşyklary deňhukuklylyk, özara hormat goýmak, ynanyşmak ýörelgelerine esaslanýar. Söwda-ykdysady hyzmatdaşlyk döwletara dialogyň möhüm ugry bolup durýar. Energetika, senagat, saglygy goraýyş ulgamlaryndaky özara gatnaşyklarda oňyn netijeler gazanyldy. Ulag-logistika pudagy hem hyzmatdaşlygyň esasy ugurlarynyň biri hökmünde çykyş edýär.
3. Eýranyň Prezidenti Masud Pezeşkian mukaddes Oraza aýynyň ýetip gelmegi mynasybetli Türkmenistanyň Prezidenti Serdar Berdimuhamedowa hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa gutlag hatlaryny iberdi. Pezeşkian hatlarynda bu aýyň ähli musulmanlar üçin aýratyn ähmiýetini belledi.
4. Türkmen halkynyň Milli Lideri Gurbanguly Berdimuhamedow abraýly «Euronews» teleýalymyna interwýu berdi. Interwýunyň dowamynda Türkmenistanyň içeri we daşary syýasatynyň esasy ugurlary beýan edildi.
https://turkmenportal.com/blog/88720/predsedatel-halk-maslahaty-turkmenistana-dal-intervyu-euronews
5. Türkmenistanyň Prezidenti Serdar Berdimuhamedow Halkara zenanlar güni mynasybetli sekiz we şondan köp çagany dünýä indiren eneleriň 253-sine Türkmenistanyň «Ene mähri» diýen hormatly ady dakmak hakynda Permana gol çekdi. Bu hormatly at eneleriň ösüp gelýän nesilleri ata Watanyna we merdana halkyna wepaly, sagdyn hem-de ruhubelent adamlar edip ýetişdirmekde bitiren uly hyzmaty üçin dakyldy.
6. 19-njy martda Aşgabatda «Halkara parahatçylyk we ynanyşmak ýyly: durnukly ösüşi üpjün etmekde sebitara ykdysady hyzmatdaşlygyň orny» atly halkara maslahat geçiriler. Bu barada Hökümet mejlisinde wise-premýer, daşary işler ministri Raşid Meredowyň hasabatynda aýdyldy. Bu çäräniň maksatnamasyna sebit hyzmatdaşlygynyň möhüm meseleleri boýunça mowzuklaýyn mejlisleriň 5-si giriziler.
7. Londonda Türkmenistanda London uniwersitetiniň bilim maksatnamalaryny durmuşa geçirmek mümkinçiligi ara alnyp maslahatlaşyldy. Maksatnamalaryň amala aşyrylmagy türkmen talyplaryna ýurduň çäginden çykman halkara derejesinde ykrar edilýän diplomlary almaga mümkinçilik döreder. Maslahatlaşma Türkmen-Britan söwda-senagat geňeşiniň mejlisiniň çäklerinde guralan duşuşykda geçirildi.
Dünýäde
1. 2024-nji ýylda Abu-Dabidäki Şeýh Zaýediň uly metjidi görlüp-eşidilmedik derejede köp adamly boldy we 6,5 milliondan gowrak myhmany kabul etdi. Bu görkeziji geçen ýyl bilen deňeşdirilende 20% köpdür. Gelenleriň umumy sanyndan 2,2 milliony namaz okamak üçin gelen musulmanlar, 4,2 milliony bolsa syýahatçylardyr.
2. Hytaýly işläp düzüjiler adamyň daş keşbini üýtgedip biljek innowasion ýüz maskasyny hödürlediler. Enjam sekiz görnüşli ýüzi şekillendirip bilýär we ýüz tanamak ulgamlaryndan geçmek üçin ulanylyp bilner. Köp gatly silikon maska ýüzi doly örtýär we daşky keşbi hakyky wagt birliginde üýtgedýär. Ýyladyş elementleri we termohrom mikrokapsulalar bilen enjamlaşdyrylan ýokarky gatlak deriniň reňkini açyklykdan garaýagyzlyga üýtgetmek üçin jogapkärdir.
Sport täzelikleri
1. Türkmen tennisçileri Türkiýede geçiriljek abraýly halkara ýaryşynda çykyş ederler. Türkiýäniň Manawgat şäherinde «ITF Masters» toparlaýyn dünýä çempionaty başlaýar, oňa Türkmenistanyň topary ilkinji gezek gatnaşar. Bäsleşige 30, 35, 40 we 45+ ýaş derejelerinde bäsleşjek 126 topar gatnaşar. Türkmen topary 30+ derejesinde çykyş eder, onda 4 toparçaa bölünen 12 topar çempionlyk ugrunda bäsleşer. Türkmen topary Beýik Britaniýanyň we Kanadanyň toparlary bilen bilelikde «B» toparça düşdi. Toparçanyň ýeňijileri pleý-off tapgyryna çykarlar. Milli ýygyndy toparyň düzümine: ýurduň birinji raketkasy Ýuriý Rogusskiý, 2024-nji ýylda Türkmenistanyň kubogynyň bürünç medalynyň eýesi Gurbanberdi Gurbanberdiýew, şeýle hem ýurduň ozalky birinji raketkalary, 2013-nji ýylda Aziýa we Okeaniýa zolagynyň IV toparynda bilelikde Dewisiň kubogyny gazanan Aleksandr Ernepesow we Eziz Döwletow girdi.
