Türkmenistanyň Prezidenti Döwlet howpsuzlyk geňeşiniň mejlisini geçirdi, Yragyň Premýer-ministri Aşgabatda geçiriljek halkara parahatçylyk forumyna çagyryldy, «Arkadagyň» futbolçylary Çagyryş ligasynyň 1/4 finalynyň ilkinji oýnunda ýeňiş gazandylar we beýleki habarlar
Türkmenistanda
1. Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň mejlisini geçirdi. Mejlisde harby we hukuk goraýjy edaralaryň şu ýylyň iki aýynda ýerine ýetiren işleriniň jemleri jemlenildi. Döwlet Baştutany ýurduň Ýaragly Güýçlerini kämilleşdirmek we serkerdeleriň hünär derejesini yzygiderli ýokarlandyrmak işlerini dowam etmegi tabşyrdy.
https://turkmenportal.com/blog/88628/prezident-turkmenistana-provel-zasedanie-gossoveta-bezopasnosti
2. Türkmenistanyň Prezidenti Serdar Berdimuhamedow telefon arkaly söhbetdeşligiň dowamynda Yrak Respublikasynyň Premýer-ministri Mohammed Şiýa Al Sudanini 12-nji dekabrda Aşgabatda geçiriljek halkara parahatçylyk forumyna gatnaşmaga çagyrdy. Bu çäre Türkmenistanyň hemişelik Bitaraplygynyň 30 ýyllygyna bagyşlanar. Yrak Respublikasynyň Premýer-ministri çakylygy hoşallyk bilen kabul etdi.
3. Söhbetdeşligiň dowamynda taraplar türkmen tebigy gazyny Eýranyň çäginden Yraga ibermegiň meselelerini ara alyp maslahatlaşdylar.
https://turkmenportal.com/blog/88632/turkmenistan-i-irak-obsudili-postavki-gaza-po-sheme-swap
4. Şeýle hem Türkmenistanyň Prezidenti Aşgabatda Yrak Respublikasynyň diplomatik wekilhanasynyň açylmagy üçin ýardam bermäge taýýardygyny tassyklady.
5. Aşgabat şäheriniň Büzmeýin etrabynyň Altyn nesil köçesiniň ugrundaky täze ýaşaýyş toplumynda otaglarynyň ýerleşdirilişi gowulandyrylan üç sany köp öýli ýaşaýyş jaýy dabaraly ýagdaýda ulanmaga berildi. Jaýlaryň açylyş dabarasy Halkara zenanlar gününiň öňüsyrasynda geçirildi. Otaglarynyň ýerleşdirilişi gowulandyrylan täze giň öýlere eýe bolmak göçüp gelenleriň durmuşynda ýatdan çykmajak waka boldy. Şonuň üçin şu gün bu ýerde baýramçylyk gurşawy emele geldi.
https://turkmenportal.com/blog/88651/v-ashhabade-sdali-v-ekspluataciyu-tri-mnogokvartirnyh-doma
6. Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewanyň gatnaşmagynda maslahat geçirildi. Onuň barşynda çagalar sagaldyş-dikeldiş merkezinde alnyp barylýan işler barada pikir alşyldy. Şeýle hem bu ýerde gaznanyň işini mundan beýläk-de ýokary derejede ýola goýmak bilen bagly meseleler ara alnyp maslahatlaşyldy.
7. Ýewropanyň Täzeleniş we ösüş bankynyň wekiliýeti ýerli bank ulgamynyň zerurlyklaryny öwrenmek we hyzmatdaşlygyň täze ugurlaryny kesgitlemek üçin Türkmenistana sapar bilen geldi. Türkmenistanyň daşary işler ministriniň orunbasary Mähri Bäşimowa bilen geçirilen duşuşygyň dowamynda taraplar hyzmatdaşlygyň uzak möhletli we netijeli häsiýetini bellediler. Bu dürli ugurlar boýunça 80-den gowrak taslamanyň durmuşa geçirilmeginde öz beýanyny tapýar.
Dünýäde
1. Amerikaly biologlar takmynan 4000 ýyl ozal ýitip giden mamontlaryň sütüklerine meňzeş ýörite galyň sütükli genetiki taýdan üýtgedilen syçanlary döretdiler. Alymlar syçan düwünçegindäki ýedi geni üýtgetmegi başardylar, bu bolsa adaty bolmadyk uzyn we galyň sütükli gemrijileriň döremegine sebäp boldy.
https://turkmenportal.com/blog/88642/genetiki-sozdali-myshei-s-mehom-kak-u-vymershih-mamontov
2. Siriýaly balerina Ýara Hdeýr iki sany hereketdäki kwadrosikliň arasynda şpagat ýerine ýetirip, Ginnesiň rekordlar kitabyna girdi. Şpagat ýagdaýynda deňagramlylygyny saklap, Ýara Dubaýyň çölünde sagatda takmynan 10 km tizlik bilen 470 metr aralygy geçdi.
Sport täzelikleri
1. «Arkadagyň» futbolçylary AFK-nyň Çagyryş ligasynyň 1/4 finalynyň deslapky oýnunda Hindistanyň «Ist Bengal» klubuny ýeňlişe sezewar etdiler. Çarşenbe güni Kalkutta şäherinde geçirilen oýun 1:0 hasabynda myhmanlaryň ýeňşi bilen tamamlandy. Oýundaky ýeke-täk gol 10-njy minutda Ýazgylyç Gurbanow tarapyndan derwezä gönükdirildi. Bu iki toparyň arasyndaky jogap oýny 12-nji martda «Arkadag» toparynyň meýdançasynda geçiriler.
https://turkmenportal.com/blog/88627/arkadag-obygral-ist-bengal-v-matche-14-finala-ligi-vyzova-afk
