Türkmenistanda 2025-nji ýylda diplomlary ykrar ediljek daşary ýurt ýokary okuw mekdepleriniň sanawy çap edildi, Saud Arabystanynyň ilçisi Aşgabatdaky diplomatik işini tamamlady, Türkmenistanyň Futbol federasiýasynyň Kubogynyň oýunlary Babaraba geçirildi we beýleki habarlar
Türkmenistanda
1. Türkmenistanyň Bilim ministrligi 2025-nji ýylda ýurtda diplomlary ykrar ediljek daşary ýurt ýokary okuw mekdepleriniň täzelenen sanawyny çap etdi. Bu sanaw dünýäniň öňdebaryjy uniwersitetleriniň reýtingleriniň esasynda düzüldi. Ýokary okuw mekdepleriniň doly sanawy we nostrifikasiýa amaly baradaky giňişleýin maglumatlar bilen Türkmenistanyň Bilim ministrliginiň resmi saýtynda tanşyp bolar.
2. Türkmenistanyň daşary işler ministri Raşid Meredow Aşgabatda özüniň diplomatik işini tamamlaýan Saud Arabystany Patyşalygynyň ilçisi Said bin Osman Ahmed Suweýd bilen duşuşyk geçirdi. Duşuşygyň barşynda taraplar syýasy-diplomatik, söwda-ykdysady we medeni-ynsanperwer ugurlary boýunça ikitaraplaýyn we köptaraplaýyn hyzmatdaşlygyň netijeliligini bellediler. Ilçi diplomatik wezipesini durmuşa geçirmekde beren hemmetaraplaýyn goldawy hem-de degişli ýardamlary üçin türkmen tarapyna özüniň hoşallygyny bildirdi.
3. Tatarystanda bilim alýan türkmen talyplary »Medeniýetleriň kaleýdoskopy» atly Respublikan bilim festiwalynyň açylyş dabarasyna gatnaşdylar. Açylyş dabarasynyň öňüsyrasynda ussatlyk sapaklary guraldy, olarda türkmen talyplary Türkmenistan barada çykyş etdiler. Mekdep okuwçylary Magtymguly Pyragynyň ömri we döredijiligi bilen tanyşdyryldy, onuň goşgulary türkmen, rus we tatar dillerinde okaldy. Şeýle hem çagalara alaja örmek öwredildi. Ýörite guralan konsertde Türkmenistan, dostluk we parahatçylyk hakynda aýdymlar ýaňlandy.
4. Türkmenistanyň Pakistandaky ilçisi Atajan Möwlamow Merkezi Aziýa ýurtlarynyň we Azerbaýjanyň ilçileri bilen bilelikde Gujranwala şäheriniň Söwda-senagat edarasynyň we şäheriň işewürlik merkeziniň çakylygy boýunça geçirilen birnäçe çärelere gatnaşdy. Gujranwalada şäheriň Söwda-senagat edarasynyň ýolbaşçylary we agzalary bilen duşuşyklar geçirildi. Taraplar söwda-ykdysady gatnaşyklary giňeltmegiň we söwda-senagat edaralarynyň arasynda hyzmatdaşlyklary ýola goýmagyň mümkinçiliklerini, şeýle hem ýurtlaryň kiçi we orta kärhanalarynyň arasyndaky hyzmatdaşlygy pugtalandyrmagyň meselelerini ara alyp maslahatlaşdylar.
5. Türkmenistanyň Astanadaky ilçisi Batyr Rejepow Birleşen Milletler Guramasynyň Ilat gaznasynyň Gazagystanda täze bellenen wekili, Türkmenistan we Gyrgyzystan boýunça ýurt müdiri Çinwe Ogbonna bilen duşuşdy. Taraplar Türkmenistan bilen UNFPA-nyň arasyndaky hyzmatdaşlygyň ýokary derejesini nygtadylar. 2021 – 2025-nji ýyllar üçin dördünji ýurt maksatnamasyny hemmetaraplaýyn durmuşa geçirmegiň çäklerinde bilelikdäki hereketleriň netijeliligi bellenildi.
Dünýäde
1. Mýunhende howply waka boldy. Bir ulag demonstrantlar toparynyň üstüne sürüldi, netijede, azyndan 15 adam ýaralandy. Wakanyň şaýatlary sürüjiniň bilkastlaýyn ulagy adamlar toparynyň üstüne sürendigini belleýärler. Häzirki wagtda hukuk goraýjy edaralar wakanyň ýagdaýlaryny we sebäplerini derňeýärler. Polisiýa bu ýagdaýy eýýäm gözegçilik astyna aldy we sürüjiniň indi howp döretmeýändihine ynandyrdy.
https://turkmenportal.com/blog/87887/v-myunhene-avtomobil-vehal-v-tolpu-demonstrantov
2. Los-Anjeles sebitindäki ýangynlar ätiýaçlandyryş pudagy üçin heläkçilikli netijelere getirdi. Bilermenler 250 milliard dollarlyk umumy ykdysady zyýan hasaba alnanda, ätiýaçlandyryş kompaniýalarynyň takmynan 40 milliard dollar öwez tölegini tölemäge mejbur boljakdygyny çaklaýarlar. Kaliforniýanyň ätiýaçlandyryş pudagy çynlakaý çökgünligi başdan geçirýär. Sarp edijileri goramak babatynda kanunçylygyň güýçlendirilmegi we tebigy betbagtçylyklaryň ýygylaşmagy ätiýaçlandyryjylary sebit bazaryndan çykmaga mejbur edýär.
Sport täzelikleri
1. Belarus Respublikasynyň «Torpedo-BelAZ» futbol kluby Türkmenistanyň milli ýygyndysynyň 24 ýaşly ýarymgoragçysy Teýmur Çaryýew bilen 1 ýyllyk şertnama baglaşdy. Çaryýew professional karýerasyna 18 ýaşynda Türkmenistanyň «Energetik» toparynda başlady. 2022-nji ýylda Türkmenistanyň 23 ýaşa çenli ýaşlar ýygyndysynyň düzüminde Aziýa çempionatyna gatnaşyp, Eýran bilen oýunda uzakdan geçiren goly arkaly toparyna taryhy ýeňşi gazandyrdy. T.Çaryýew esasy üstünliklerini Gyrgyzystanyň «Abdyş-Ata» toparynyň düzüminde gazandy. Ol bu toparyň düzüminde iki möwsüm oýnap, 65 duşuşykda meýdança çykdy, 7 gol urdy hem-de 8 gezek golly pas bedi. Şeýle-de «Abdyş-Ata» bilen iki gezek ýurduň çempiony bolmagy başardy. 22 ýaşynda Türkmenistanyň milli ýygyndysynyň düzüminde ilkinji gezek meýdança çykdy, jemi 9 oýna gatnaşyp, 1 gezek tapawutlandy.
2. 14-nji fewralda başlajak Türkmenistanyň Futbol federasiýasynyň Kubogynyň 2025-nji ýyldaky ýaryşy Aşgabatdan Ahal welaýatynyň Gökdepe etrabynyň Babarap geňeşligindäki sport mekdep-internatynyň meýdançasyna geçirildi. Bu barada Futbol federasiýasynyň metbugat gullugy habar berdi. Ýaryş 14 – 23-nji fewral aralygynda dowam eder, oňa Türkmenistanyň Ýokary ligasyndan 6 klub: «Arkadag», «Ahal», «Aşgabat», «Merw», «Nebitçi» we Şagadam gatnaşar. Düzgüne laýyklykda, ýaryş aýlaw tertibinde geçiriler, iň köp utuk toplan topar ýeňiji diýlip yglan ediler.
3. 31 ýaşly türkmen hüjümçisi Süleýman Muhadow erkin agent hökmünde Aşgabadyň «Altyn Asyryna» geçdi. Geçen möwsüm hüjümçi Gyrgyzystanyň çempionatynda çykyş etdi, ol ýerde iki kluba: «Alaý» we «Abdyş-Ata» toparlaryna wekilçilik etdi. Jemi 23 oýunda 6 pökgi geçirdi. Muhadow Aşgabadyň «Olimp» sport mekdebiniň uçurymydyr.
https://turkmenportal.com/blog/87895/suleiman-muhadov-pereshel-v-ashhabadskii-altyn-asyr
4. Türkmenistanyň milli ýygyndysynyň we Litwanyň «Žalgiris» klubynyň ýarym goragçysy Maýa Musaskaýa Merkezi Aziýanyň futbol assosiasiýasynyň çempionatynyň 3-nji tapgyrynda Täjigistan bilen geçiren duşuşykda iň gowy oýunçy diýlip ykrar edildi. Duşenbede geçirilen oýun Kamil Mingazowyň komandasynyn ýeňşi bilen tamamlandy. Musaskaýa ýeke-täk goluň awtory boldy. Üçünji oýun gününiň netijelerine görä, Türkmenistanyň ýygyndysy 4 utuk toplamagy başardy we ýaryşyň sanawynda ikinji orna çykdy.
