Fransiýanyň «Pari Sen-Žermen» futbol kluby ýarym finalyň jogap oýnunda Angliýanyň «Arsenal» klubyny 2:1 hasaby bilen ýeňip, UEFA-nyň Çempionlar ligasynyň finalyna çykdy.
Duşuşyk Parižiň «Park de Prens» stadionynda geçirildi. Meýdança eýeleri 27-nji minutda ispaniýaly ýarym goragçysy Fabian Ruisiň takyk urgusynyň netijesinde hasaby açdylar. 69-njy minutda parižlileriň portugaliýaly ýarym goragçysy Wintinýa 11 metrlik jerime urgusyny amala aşyryp bilmedi, ol topy gönümel «Arsenalyň» derwezeçisi Dawid Raýýu tarap gönükdirdi. 72-nji minutda PSŽ-niň marokkoly goragçysy Aşraf Hakimi meýdança eýeleriniň üstünligini artdyrdy. «Arsenal» 76-njy minutda iňlisleriň hüjümçisi Bukaýo Sakanyň goly bilen yza galmagyny biraz azaltdy. Londonda geçirilen birinji duşuşyk 1:0 hasabynda fransuz klubynyň ýeňşi bilen tamamlanypdy.
Final duşuşygynda PSŽ-niň garşydaşy iki duşuşygyň jemine görä Ispaniýanyň «Barselona» klubyny ýeňen (3:3, 4:3 – goşmaça wagtdan soň) Italiýanyň «Inter» kluby bolar. Çempionlar ligasynyň finaly 31-nji maýda Mýunheniň «Alýans Arena» stadionynda geçiriler.
«Pari Sen-Žermen» kluby üçin bu Çempionlar ligasynyň taryhynda ikinji finaly bolar. 2020-nji ýylda fransuz kluby Germaniýanyň «Bawariýa» klubyndan 0:1 hasabynda ýeňilipdi. «Inter» bu ýaryşyň esasy duşuşygynda ýedinji gezek çykyş eder. Milanyň kluby onda üç gezek – 1964, 1965 we 2010-njy ýyllarda ýeňiji bolupdy. Italiýanyň kluby soňky gezek 2023-nji ýylda finala çykyp, ol ýerde Angliýanyň «Mançester Siti» klubyndan 0:1 hasaby bilen ýeňilipdi.
Häzirki kubogyň eýesi Madridiň «Real» klubydyr, ol geçen möwsümde Dortmundyň «Borussiýa» klubyny 2:0 hasaby bilen ýeňdi. Ispaniýanyň kluby Çempionlar ligasyndaky ýeňişleriň sany boýunça rekord netijäni saklap gelýär – ol bu ýaryşda 15 gezek ýeňiş gazanmagy başardy.
