Türkmenistanyň Gyzyl Ýarymaý milli jemgyýeti ÝUNISEF bilen bilelikde 5-nji maýdan 22-nji maýa çenli tebigy betbagtçylyklara ýokary töwekgelçiligi bolan Lebap we Daşoguz welaýatlarynyň mekdeplerinde howpsuzlygy güýçlendirmek we adatdan daşary ýagdaýlara taýýarlyk boýunça çäreleri geçirdi.
Çäreler ýerli edaralaryň mümkinçiliklerini güýçlendirmäge, işleriň utgaşdyrylyşyny gowulandyrmaga we çagalaryň, mugallymlaryň we maşgalalaryň bolup biljek adatdan daşary ýagdaýlara we tebigy betbagtçylyklara täsirlenmäge has gowy taýýarlanmagyny üpjün etmäge gönükdirildi.
Amaly sapaklaryň dowamynda mekdep müdirleri, mugallymlar, ýerli edaradyr guramalaryň wekilleri, Türkmenistanyň Gyzyl Ýarymaý milli jemgyýetiniň meýletinçileri we gyssagly kömek beriş gulluklarynyň işgärleri töwekgelçilikleri dolandyrmaga we çagalary goramaga gönükdirilen tebigy betbagtçylyklarda özüňi alyp barmak boýunça amaly maşklara gatnaşdylar.
Gatnaşyjylar mekdepleriň adatdan daşary ýagdaýlara täsirlenmek boýunça meýilnamalaryny täzelediler, betbagtçylyk emele gelen ýerden çykyp gitmek boýunça türgenleşikleri geçirdiler we maýyp çagalaryň howpsuzlygyny üpjün etmegi öz içine alýan çemeleşmeleri öwrendiler. Sapaklarda şeýle hem adatdan daşary ýagdaýlardaky jyns aýratynlyklary seredildi we mekdeplerde gurluş däl howpsuzlyk töwekgelçiliklerini bahalandyrmak üçin gurallar teklip edildi.
Ýerli edaralaryň wekilleri, mugallymlar we Türkmenistanyň Gyzyl Ýarymaý milli jemgyýetiniň meýletinçileri amaly türgenleşiklere gatnaşdylar, bu olaryň ilkinji kömegi utgaşdyrmak, betbagtçylyk emele gelen ýerden çykyp gitmek boýunça amallary we ir duýduryş çärelerini amala aşyrmak ukybyny güýçlendirdi. Bu çäreler okuwçylaryň we ýerli jemgyýetleriň howpsuzlyk medeniýetini ösdürmäge we durnuklylygyny ýokarlandyrmaga möhüm goşant boldy – diýip, ÝUNISEF-iň metbugat habarynda aýdylýar.
