2025-nji ýylyň 18-19-njy maýynda Eýran Yslam Respublikasynyň Daşary işler ministrliginiň Syýasy we halkara barlaglar merkezi tarapyndan Tähran şäherinde Tähran dialog forumy – 2025 geçirildi.
Forumyň işine Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow hem gatnaşdy.
«Hindi subkontinentinden Ýewraziýa çenli: ulag geçelgeleri, geoykdysadyýet we täze döreýän mümkinçilikler» atly umumy mejlisde çykyş eden R.Meredow durnukly ykdysady ösüşiň we sebitleriň özara baglanyşygynyň esasy şerti hökmünde ulag-logistika ulgamynyň ösüşindäki Türkmenistanyň garaýşyny beýan etdi.
Ol kontinentara geçelgeleriň durmuşa geçirilmeginiň halkara hyzmatdaşlygynyň esasy sütünine öwrülmelidigini belledi. Bu ugurda aýratyn üns Türkmenistanyň Beýik Ýüpek ýoluny dikeltmek başlangyjyna gönükdirildi. Bu başlangyç Ýewraziýa giňişliginde integrasion meýdançany döretmäge gönükdirilendir.
Türkmenistanyň daşary syýasat edarasynyň ýolbaşçysy ulag diplomatiýasy ulgamyndaky ýurduň ileri tutýan ugurlary barada giňişleýin durup geçdi. Olaryň hatarynda milli infrastruktura taslamalarynyň amala aşyrylmagy, demir ýol we awtomobil ýol taslamalarynyň gurluşygy, Hazar deňzindäki port infrastrukturalarynyň döwrebaplaşdyrylmagy we sebitara tranzit başlangyçlaryna gatnaşygy görkezildi. Şunuň bilen birlikde, Türkmenistan, Gazagystan, Özbegistan we Eýran bilen hyzmatdaşlykda ulag-logistika gatnaşyklaryň ösdürilmeginiň ähmiýeti aýratyn nygtaldy.
R.Meredowyň çykyşynda durnukly ulag ulgamynyň Durnukly ösüş maksatlaryna ýetmekdäki orny, şeýle hem 2016-njy ýylda Aşgabatda Birleşen Milletler Guramasynyň durnukly ulag boýunça ilkinji Ählumumy maslahatynyň geçirilmegi we Türkmenistanyň başlangyjy bilen BMG-niň Baş Assambleýasy tarapyndan degişli kararnamalaryň kabul edilmegi baradaky meselelere hem aýratyn üns berildi.
Şol bir wagtyň özünde, Türkmenistanyň daşary ykdysady strategiýasynyň energetika ugrunyň ähmiýeti hem nygtaldy. Bu ugurda ýurduň energiýa serişdeleriniň eksport ugurlaryny diwersifikasiýalaşdyrmak babatda edýän tagallalary, şol sanda TOPH gaz geçiriji taslamasy we Günbatar Aziýa sebitine elektrik energiýasynyň eksportynyň giňeldilmegi baradaky meseleler bellenilip geçildi.
Tähran dialog forumynyň çäklerinde R.Meredow gatnaşyjy ýurtlaryň wekilleri bilen ikitaraplaýyn duşuşyklary geçirdi. Bu duşuşyklarda döwletara dialogyň mundan beýläk-de ösdürilmegi boýunça meseleler ara alnyp maslahatlaşyldy.
