Türkmenistanda awtoulaglara ýangyç guýulýan nokatlaryň sanyny has-da köpeltmek üçin çäreler görülýär. TDH-niň habar berşi ýaly, bu barada 31-nji ýanwarda geçirilen Hökümet mejlisiniň barşynda wise-premýer Batyr Amanowyň hasabatynda aýdyldy.
"Ministrler Kabinetiniň Başlygynyň orunbasary B.Amanow sarp edijileri nebit önümleri bilen üpjün etmek boýunça hyzmatlaryň hilini mundan beýläk-de ýokarlandyrmak babatda görülýän çäreler barada hasabat berdi. Nygtalyşy ýaly, ýurdy durmuş-ykdysady taýdan ösdürmegiň çäklerinde paýtagtda we welaýatlarda täze ýaşaýyş toplumlaryny, senagat zolaklaryny, dürli önümçilikleri döretmek babatda ägirt uly işler durmuşa geçirilýär. Şunuň bilen baglylykda, wise-premýer nebit önümleri bilen sarp edijilere hyzmat edýän nokatlary has-da artdyrmak üçin netijeli işleriň amala aşyrylýandygyny belläp, hormatly Prezidentiň garamagyna degişli teklibi hödürledi" diýlip, habarda aýdylýar.
Prezident Serdar Berdimuhamedow hasabaty diňläp, ýurtda içerki sarp edijileri hem-de üstaşyr geçýän ulaglary ýangyç serişdeleri bilen üpjün etmek babatda döwrebap hyzmatlaryň ýola goýulýandygyny aýtdy.
Döwlet Baştutany sarp edijilere edilýän hyzmatlary has-da gowulandyrmak maksady bilen, bu ugurda taýýarlanylan teklibi goldap, wise-premýere degişli işleri geçirmegi tabşyrdy.
