Türkmenistanyň Prezidenti harby gullukçylary sylaglady, Türkmenistanyň Daşary işler ministrliginiň ýolbaşçysy we BMG-niň Baş sekretary Nýu-Ýorkda duşuşyk geçirdiler, Türkmenistanda baýramçylyk at çapyşyklarynyň baýrak gaznasy 900 müň manat boldy we beýleki habarlar
Türkmenistanda
1. Türkmenistanyň Prezidenti Serdar Berdimuhamedow «John Deere» kompaniýasynyň Merkezi Aziýada strategik hyzmatdaşlygy ösdürmek boýunça ýolbaşçysy Çaba Leýko bilen duşuşyk geçirdi. Duşuşygyň dowamynda oba hojalygy pudagynda mundan beýläk-de hyzmatdaşlyk etmegiň we ýurduň obasenagat toplumyna döwrebap tehnologiýalary ornaşdyrmagyň mümkinçiliklerine garaldy.
2. Türkmenistanda ýurduň Garaşsyzlygynyň 33 ýyllygy mynasybetli harby gullukçylary we hukuk goraýjy edaralaryň işgärlerini sylaglamak dabarasy geçirildi. Prezident Serdar Berdimuhamedow olara döwlet sylaglaryny gowşurmak, harby we ýörite atlary dakmak, hünär derejelerini bermek hakynda Permanlara gol çekdi.
3. BMG-niň Nýu-Ýorkdaky baş edarasynda Türkmenistanyň daşary işler ministri Raşid Meredow bilen BMG-niň Baş sekretary Antonio Guterrişiň arasynda duşuşyk geçirildi. Taraplar hyzmatdaşlygy ösdürmek, sebitdäki parahatçylyk we howpsuzlyk meseleleri boýunça pikir alyşdylar. Türkmen tarapy ýurduň hemişelik Bitaraplyk hukuk ýagdaýyna esaslanýan daşary syýasatyny durmuşa geçirmäge ygrarlydygyny tassyklady. Şunuň bilen birlikde, Türkmenistanyň Prezidentiniň Baş Assambleýanyň ozalky sessiýasynda öňe süren Ählumumy howpsuzlyk strategiýasyny taýýarlamak boýunça başlangyjyny durmuşa geçirmekde BMG bilen ýakyndan hyzmatdaşlyk etmäge gyzyklanma bildirilýändigi habar berildi.
4. Türkmenistanda ýurduň Garaşsyzlygynyň 33 ýyllygy mynasybetli baýramçylyk at çapyşyklary geçirildi. Dabara Prezident Serdar Berdimuhamedow gatnaşdy. Bu ýerde dürli aralyga çapyşyklaryň 7-si geçirildi. Olaryň her birine atlaryň 12-si gatnaşdy. Ilkinji alty çapyşygyň ýeňijileriniň hersi 100 müň manat, jemleýji ýedinji çapyşygyň ýeňijisine bolsa Türkmenistanyň Prezidenti tarapyndan döredilen 300 müň manatlyk ýörite baýrak bilen sylaglandy. Dabaranyň jemlemesine öwrülen ahyrky çapyşykda Türkmenistanyň Prezidentiniň Ahalteke atçylyk toplumyna degişli Bezirgen atly akýal mele at ýeňiji boldy. Çapyksuwar Agamyradowyň çapan aty 1800 metr aralygy 2 minut 06,8 sekuntda geçdi.
5. Buharestde Aziýa medeniýetiniň festiwaly geçirildi, onda Türkmenistan hem medeni mirasyny tanyşdyrdy. Türkmenistanyň milli diwarlygynda döwrebap milli lybaslar, haly önümleri, saz gurallary we senetçilik önümleri görkezildi.
6. Kuala-Lumpurda Indoneziýanyň ýaş alymlar assosiasiýasy we MAHSA uniwersiteti tarapyndan guralan 6-njy Bütindünýä oýlap tapyş taslama bäsleşigi we sergisi geçirildi. Bu abraýly halkara bäsleşige 15 ýurtdan 126 zehinli mekdep okuwçysy gatnaşdy, şolaryň arasynda Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň dört okuwçysy hem bar. Türkmen mekdep okuwçylary bir altyn we üç kümüş medal gazanyp, ajaýyp netijeleri görkezdiler.
Dünýäde
7. Günorta Koreýanyň 80 ýaşly ýaşaýjysy Çhwe Sun Hwa «Älem gözeli» bäsleşiginiň milli saýlama ýaryşynyň finalyna çykyp, dünýäni geň galdyrdy. Çhwe Meksikada geçiriljek «Älem gözeli – 2024» bäsleşiginiň halkara tapgyrynda Koreýa wekilçilik etmek hukugy üçin şu gün beýleki gatnaşyjylar bilen bäsleşer. Ozal ýaryşa gatnaşyjylaryň ýaşy 18 – 28 ýaş bilen çäklendirilýärdi, ýöne 2024-nji ýyldan başlap iň ýokary ýaş çägi aradan aýryldy. «Men dünýäni haýran galdyrmak isleýärin: “80 ýaşly aýal nädip beýle sagdyn bolup bilýär? Şeýle bedeni nädip saklamagy başarýar? Ol nähili berhiz tutýar?” Garranyňyzda agramyňyz artýar... Şonuň üçin men garranymyzda-da sagdyn durmuşda ýaşap biljekdigimizi görkezmek isleýärin» diýip, Çhwe beren interwýusynda belledi.
Sport habarlary
8. Kikboksing boýunça dünýä çempiony we Türkmenistanyň Taýboks federasiýasynyň başlygy, meşhur türgen Orazmuhammet Bäşimowyň ýolbaşçylygynda ýurduň türgenleri şu ýylyň oktýabr aýynda geçiriljek taý boksy boýunça Türkmenistanyň Kubogyna işjeň taýýarlyk görýärler. Aşgabatdaky «Söweşjeň ellikler» sport klubyna ýolbaşçylyk edýän Bäşimow ýaş türgenleriň taýýarlygyna aýratyn üns berýär. Onuň şägirtleri, şol sanda doganlar Yslam we Selim Şamuhammedowlar ýetip gelýän ýaryşda gowy netijeleri görkezmäge umyt edip, höwes bilen türgenleşýärler. 2014-nji ýylda döredilen Türkmenistanyň Taýboks federasiýasy tutuş ýurt boýunça 200-e golaý türgeni bir ýere jemleýär. Ýakynda geçiriljek Kubok ugrundaky ýaryş Türkmenistanda bu sporty ösdürmekde we geljekki halkara ýaryşlaryna taýýarlykda möhüm tapgyr bolar.
