Aşgabatda 12-13-nji maý aralygynda Ählumumy ekologiýa gaznasy–BMG-niň Ösüş maksatnamasy–ÝUNESKO-nyň «Durnukly ösüşiň toplumlaýyn usullaryny işläp düzmek we howanyň üýtgemegine uýgunlaşmak üçin niwal-buzluk ulgamlaryna baha bermek boýunça sebit hyzmatdaşlygyny goldamak arkaly Merkezi Aziýa ýurtlarynyň durnuklylygyny pugtalandyrmak» sebit taslamasynyň çäklerinde okuw-seminary geçirildi.
«Türkmenistan: Altyn asyr» neşiriniň habar berşi ýaly, çäräniň işine döwlet edaralarynyň wekilleri, glasiologlar (buzluklary öwrenýän alymlar), klimatologlar we gidrologlar, şeýle-de sebitiň bäş ýurdunyň raýat jemgyýetçilik guramalaryndan wekiller gatnaşýarlar.
Seminaryň açylyş dabarasynda çykyş eden Türkmenistanyň ÝUNESKO-nyň işleri boýunça Milli iş toparynyň jogapkär sekretary Çynar Rüstemowa şeýle belledi:
«Sebitleýin hyzmatdaşlyk, howanyň üýtgemegi şertlerinde aýratyn ähmiýete eýe bolýar – suw diňe baýlygyň çeşmesi däl, ol – ýaşaýşyň özenidir. Buzluklardan iýmitlenýän derýalaryň bar ýerinde, Türkmenistanyň mysalynda bolşy ýaly, uýgunlaşmak meseleleri örän wajyp bolup durýar».
Okuw-seminary Merkezi Aziýada milli çäreleriň toplumynda Gazagystan, Täjigistan we Özbegistanda geçirilen duşuşyklardan soň, dördünji boldy. Seminarlar toplumy Gyrgyzystan Respublikasynda dowam eder we şu ýylyň iýun aýynda tamamlanar.
