Türkmenistanyň Prezidenti «Türkmenistanyň Gahrymany» diýen ady dakdy, Arkadag şäherini 2024 – 2052-nji ýyllarda ösdürmegiň Konsepsiýasy tassyklandy, Türkmenistan 2025-nji ýylda «Halkara parahatçylyk we ynanyşmak ýyly» mynasybetli çäreleri geçirmäge taýýarlyk görýär we beýleki habarlar
Türkmenistanda
1. Türkmenistanyň Prezidenti Serdar Berdimuhamedow Türkmenistanyň Dokma senagaty ministrliginiň «Dokmaçylar» medeni merkeziniň folklor-etnografiýa tans toparynyň çeper ýolbaşçysy Annajemal Saparowna Nurmuhammedowa, Türkmenistanyň Suratkeşler birleşiginiň agzasy, erkin suratkeş Saragt Babaýewe we Garaşsyz Döwletleriň Arkalaşygynyň Tohumçylyk meseleleri boýunça hökümetara utgaşdyryjy geňeşiniň başlygy, akademik Iwan Iwanowiç Kuzmine «Türkmenistanyň Gahrymany» diýen ady dakmak hakynda Permanlara gol çekdi.
2. Türkmenistanyň Prezidenti Serdar Berdimuhamedow Arkadag şäherini 2024 — 2052-nji ýyllarda ösdürmegiň Konsepsiýasyny tassyklamak hakynda Permana gol çekdi. Bu strategiki resminama şäheriň ähli ulgamlaryny sazlaşykly we durnukly ösdürmäge, ilatyň ýaşamagy, zähmet çekmegi, dynç almagy üçin amatlyklary üpjün etmäge, ýaşaýyş-durmuş derejesini has-da ýokarlandyrmaga gönükdirilendir.
3. Türkmenistanyň Prezidenti Serdar Berdimuhamedow 2025-nji — Halkara parahatçylyk we ynanyşmak ýylyny geçirmek bilen bagly çäreleriň guramaçylykly geçirilmegini üpjün etmek hakynda Permana gol çekdi. Geljek ýyl halkara hyzmatdaşlygyny pugtalandyrmaga, parahatçylyk we ynanyşmak ýörelgelerini ilerletmäge gönükdirilen dabaralar hem-de çäreler geçiriler
4. Türkmenistanyň Prezidenti Serdar Berdimuhamedow Türkmenistanda ylym ulgamyny ösdürmegiň 2024 — 2052-nji ýyllar üçin Strategiýasyny tassyklamak hakynda Permana gol çekdi. Resminama döwrebap ylmy barlaglary alyp barmaga, ylmyň gazananlaryny ykdysadyýetiň pudaklaryna ornaşdyrmaga hem-de bilimiň, ylmyň, önümçiligiň özara baglanyşygyny has-da ýokarlandyrmaga gönükdirilendir.
5. Türkmenistanyň Prezidenti Serdar Berdimuhamedow ýurduň öňdebaryjy ýedi zenanyny «Zenan kalby» ordeni bilen sylaglamak hakynda Permana gol çekdi. Bu sylag olaryň Türkmenistanyň Garaşsyzlygyny we özygtyýarlylygyny berkitmäge, milli medeniýetini ösdürmäge we ösüp gelýän ýaş nesli türkmen halkynyň däp-dessurlaryna hormat goýmak duýgusynda, watançylyk ruhunda terbiýelemäge goşan uly şahsy goşantlary üçin gowşuryldy.
6. Türkmenistanyň Prezidenti Serdar Berdimuhamedow ýurduň öňdebaryjy ýaşulularynyň birnäçesine «Hormatly il ýaşulusy» diýen adyny dakmak hakynda Permana gol çekdi. Bu hormatly at olaryň Türkmenistanyň Garaşsyzlygyny we özygtyýarlylygyny berkitmekde, milli däp-dessurlaryny we adatlaryny ösdürmekde, ýaş nesilleri watançylyk we zähmetsöýerlik ruhunda terbiýelekde bitiren hyzmatlary nazara alnyp dakyldy.
7. Türkmen halkynyň Milli Lideriniň başlyklyk etmeginde geçirilen Türkmenistanyň Halk Maslahatynyň mejlisinde ýaşlar barada döwlet syýasatyny amala aşyrmak bilen bagly esasy wezipeler kesgitlendi. Gurbanguly Berdimuhamedow öz çykyşynda mekdebe çenli çagalar edaralarynyň hem-de umumybilim berýän orta mekdepleriň sanyny artdyrmagyň, saglygy sebäpli mümkinçiligi çäkli çagalar bilen alnyp barylýan işleri kämilleşdirmegiň, olar bilen işleýän pedagogik işgärleriň hünärini ýokarlandyrmagyň möhümdigini nygtady. Şeýle hem ýokary okuw mekdeplerinde ylym-bilim-önümçilik arabaglanyşygynyň kämil usulyny döretmegiň zerurdygy bellenildi.
8. 8-nji oktýabrdan «Türkmenistan» awiakompaniýasy Aşgabat — Frankfurt — Aşgabat ugry boýunça goşmaça gatnawlary ýola goýar. Häzirki wagtda awiakompaniýa bu ugur boýunça hepdede iki gezek — çarşenbe we şenbe günleri howa gatnawyny amala aşyrýar. «Türkmenhowaýollarynyň» ähli içerki we halkara uçuşlaryna petekler awiakompaniýanyň turkmenistanairlines.tm resmi saýtynda onlaýn satyn almak üçin elýeterlidir.
Dünýäde
9. Florida uniwersitetiniň Dermatologiýa kafedrasynyň alymlary tarapyndan geçirilen täze gözleg klýukwa içgisiniň garramaga garşy garaşylmadyk peýdalaryny ýüze çykardy, bu aýratyn-da 40 ýaşdan geçen aýallar üçin peýdalydyr. Synagyň netijeleri ýörite taýýarlanan klýukwa şiresini yzygiderli sarp eden gatnaşyjylaryň derisiniň ýagdaýynyň ep-esli gowulaşandygyny görkezdi. Klýukwa şiresini sarp eden aýallar derisiniň gurluşynyň we çeýeliginiň görnetin gowulaşandygyny bellediler. Ýörite enjamlary ulanmak arkaly geçirilen obýektiw ölçegler deriniň maýyşgaklygynyň ýokarlanandygyny tassyklady. Mundan başga-da, deriniň mikroflorasynda we lipid gatlagynda oňyn üýtgeşmeler hasaba alyndy.
10. Ginnesiň rekordlar kitaby Miçigan ştatynyň ýaşaýjysy 16 ýaşly Erik Kilbern-kiçini dünýäniň iň uly beden agzalarynyň eýesi hökmünde resmi taýdan ykrar etdi. Ölçeglere laýyklykda, ýaş rekordsmeniň dabanynyň uzynlygy 34,3 santimetre, aýasy bolsa 23,2 santimetre ýetýär. Deňeşdirsek, ýetginjekleriň aýasynyň ortaça uzynlygy 19 santimetr töweregidir.
Sport habarlary
11. Türkmenistanyň 20 ýaşa çenli ýaşlar ýygyndysynyň baş tälimçisi Döwletmyrat Annaýew Aziýa Kubogynyň saýlama ýaryşynyň başlamagynyň öňüsyrasynda «Turkmenportal-yň» habarçysy bilen geçirilen aýratyn söhbetdeşlikde toparyň taýýarlygy barada gürrüň berdi we Ýaponiýan, Gyrgyzystan we Mýanma bilen bir toparçada çykyş etjek şägirtleriniň mümkinçiliklerine baha berdi. Tälimçiniň bellemegine görä, milli ýygyndy Gyrgyzystanda geçirilen CAFA çempionatyna, Ispaniýada we Daşkentde birnäçe synag oýunlaryna gatnaşmak bilen çynlakaý taýýarlyk gördi. Şu gün, 25-nji sentýabrda Bişkekdäki Dolen Omurzakow adyndaky stadionynda Aziýa Kubogynyň saýlama ýaryşynyň birinji tapgyrynyň oýunlary geçiriler. Türkmenistanyň ýaşlar ýygyndysy Ýaponiýanyň topary bilen oýnar. Duşuşyk Aşgabat wagty bilen 14:00-da başlar.
