Türkmenistanyň Prezidenti obasenagat toplumynyň meseleleri boýunça iş maslahatyny geçirdi, Özbegistanyň Türkmenistandaky raýatlary Oliý Majlisiň saýlawlarynda ses berip bilerler, Serdar Berdimuhamedow Hytaýyň ýolbaşçylaryny we halkyny Respublika güni bilen gutlady we beýleki habarlar
Türkmenistanda
1. Şu gün dünýä jemgyýetçiligi 1990-njy ýylda BMG-niň Baş Assambleýasynyň 45-nji sessiýasynda yglan edilen Ýaşulularyň halkara gününi belleýär. Şanly sene mynasybetli Türkmenistanyň Prezidenti Serdar Berdimuhamedow ýurduň ýaşuly nesillerine hem-de watandaşlaryna Gutlag iberdi. Baýramçylyga gabatlanylyp ýurduň ähli sebitlerinde, Aşgabat we Arkadag şäherlerinde medeni-jemgyýetçilik çäreleri geçirilýär.
2. Türkmenistanyň Bilim ministrliginiň wekiliýetiniň Amerikanyň Birleşen Ştatlaryna amala aşyran iş saparynyň çäklerinde Educational Testing Service (ETS) kompaniýasynyň hökümet we daşarky aragatnaşyklar boýunça direktory bilen duşuşyk geçirildi. Bilim synag-testlerini işläp taýýarlamak dünýä derejesinde öňdeligi eýeleýän ETS kompaniýasy özleriniň alyp barýan işlerine syn berdi we ikitaraplaýyn hyzmatdaşlygy giňeltmegiň käbir ugurlaryny teklip etdi.
3. Türkmenistanyň Prezidenti Serdar Berdimuhamedow ýurtda möwsümleýin oba hojalyk işleriniň barşyna bagyşlanan sanly ulgam arkaly iş maslahatyny geçirdi. Duşuşykda Oba milli maksatnamasynyň ýerine ýetirilişi, pagta ýygymy we bugdaý ekişi bilen baglanyşykly meseleler ara alnyp maslahatlaşyldy. Ministrler Kabinetiniň Başlygynyň orunbasary Atahallyýew oba hojalygynda alnyp barylýan işler barada hasabat berdi. Hasabatda bellenilişi ýaly, pagta ýygymy dowam edýär, şunda oba hojalyk tehnikalaryndan netijeli peýdalanylýar we ýygnalan hasylyň gaýtadan işleýän kärhanalara bökdençsiz daşalmagy üpjün edilýär.
4. Prezident Serdar Berdimuhamedow Türkmenistanyň halkynyň we Hökümetiniň adyndan, şeýle-de hut öz adyndan Hytaý Halk Respublikasynyň Başlygy Si Szinpine we Döwlet Geňeşiniň Premýeri Li Sýana hem-de ýurduň dostlukly halkyna Hytaý Halk Respublikasynyň jar edilen güni mynasybetli ýürekden gutlaglaryny, iň gowy arzuwlaryny iberdi. Gutlagda Hytaýyň häzirki döwürde öňegidişlik we gülläp ösüş ýoly bilen durmuşyň ähli ugurlarynda ynamly öňe barýandygy, bu şanly baýramy durmuş-ykdysady ösüşdäki, halkyň hal-ýagdaýyny gowulandyrmakdaky, halkara giňişlikde abraýyny berkitmekdäki uly üstünlikler bilen garşylaýandygy bellenilýär.
5. Özbegistanyň Türkmenistandaky ilçihanasynda Özbegistan Respublikasynyň Oliý Majlisiniň Kanunçykaryjy palatasynyň deputatlygyna geçiriljek saýlawlara bagyşlanan brifing geçirildi. Özbegistanyň ilçihanasynyň işleri wagtlaýyn ynanylan wekili Uktam Nazarow Aşgabatdaky ilçihanada 43-nji saýlaw uçastogynyň dörediljekdigini, bu ýerde Türkmenistanda wagtlaýyn ýa-da hemişelik ýaşaýan Özbegistanyň raýatlarynyň 2024-nji ýylyň 17 – 23-nji oktýabry aralygynda ses berip biljekdigini aýtdy. Özbegistanyň Oliý Majlisiniň Kanunçykaryjy palatasyna saýlawlar 27-nji oktýabrda geçiriler.
Dünýäde
6. Italiýanyň bilim ulgamy okuwçylaryň özüni tertipsiz alyp barşyna garşy göreşde düýpli özgertmelere taýýarlanýar. Ýurduň hökümeti mugallymlara bolan hormaty ýokarlandyrmaga we mekdeplerde tertip-düzgüni gowulandyrmaga gönükdirilen berk çäreler toplumyny işläp düzdi. Esasy täzelik düzgün bozujylara uly mukdarda pul jerimesini salmak mümkinçiligi bolar. Talyplar we olaryň maşgalalary mekdep işgärlerine garşy agressiýa ýa-da zorluk üçin 500-den 10 000 ýewro aralygynda jerime tölemeli bolarlar.
7. ABŞ-nyň günorta-gündogar ştatlary pajygaly netijelere getiren güýçli «Helen» tupanynyň geçmegi sebäpli betbagtçylygyň merkezine düşdüler. Iň soňky maglumatlara görä, betbagtçylyk azyndan 116 adamyň aradan çykmagyna sebäp bolup, yzynda weýran edilen jaýlary we infrastrukturany galdyrdy.
Sport täzelikleri
8. «Altyn asyr» AFK-2 Çempionlar ligasynyň toparçalaýyn tapgyrynyň 2-nji aýlawynda Bahreýniň «Al-Haldiýa» topary bilen geçiriljek duşuşygyna janköýerler üçin mugt giriş boljakdygyny yglan etdi. Duşuşyk 2-nji oktýabrda sagat 19:00-da «Aşgabat» stadionynda geçiriler. «Al-Haldiýa» toparynyň wekiliýeti 29-njy sentýabrda Aşgabat şäherine geldi we duşuşygyň boljak meýdançasynda türgenleşik geçirdi. Şu gün, 1-nji oktýabrda iki toparyň tälimçileriniň we oýunçylarynyň gatnaşmagynda metbugat maslahaty geçiriler.
