«Belawiýa» Türkmenbaşy bilen Minskiň arasynda gatnawlaryň sanyny artdyrýar, Türkmenistanda täze wagon abatlaýyş zawodyny gurmak meýilleşdirilýär, Aşgabatda Ermenistanyň Medeniýet günleriniň ýapylyş dabarasy geçirildi we beýleki habarlar
Türkmenistanda
1. Belarusyň «Belawiýa» awiakompaniýasy Türkmenbaşy şäheri bilen Minsk şäheriniň arasyndaky uçuşlaryň sanyny artdyrýar. Kompaniýanyň Metbugat gullugynyň habaryna görä, 23-nji noýabrdan «Belawiýanyň» uçary Minsk — Türkmenbaşy ugrunda hepdede iki gezek, ýagny sişenbe we şenbe günlerinde uçuşlary amala aşyrar. Uçuş tertibine görä, şenbe güni uçar Minskden sagat 9:30-da uçup, ýerli wagt bilen 15:35-de Türkmenbaşy şäherine geler. Ikinji gatnaw gijräk amala aşyrylar – uçar Belarusyň paýtagtyndan 22:45-de ugur alar we ertesi gün 04:50-de Türkmenbaşy şäherine geler.
2. «Demirýollary» açyk görnüşli paýdarlar jemgyýeti Balkan welaýatynyň Gyzylarbat etrabynda demir ýol wagonlaryny abatlaýyş zawodynyň taslamasyny düzmek hem-de doly taýýar derejede gurmak, şol sanda onuň ýanaşyk çägini abadanlaşdyrmak boýunça açyk görnüşli halkara tender-bäsleşigini yglan etdi. Bäsleşige gatnaşmak üçin arza tabşyrmaly, lotuň häsiýetnamasyny we tehniki talaplaryny, şeýle hem bäsleşik resminamalarynyň bukjasyny almaly. Dalaşgärler 30 günüň içinde bäsleşik üçin tekliplerini tabşyrmalydyr.
3. 29-njy oktýabrda Türkmenistanyň Döwlet medeniýet merkeziniň Mukamlar köşgünde Ermenistan Respublikasynyň Medeniýet günleriniň ýapylyş dabarasy geçirildi. Dabarada çykyş edenler şeýle döredijilik çäreleriniň iki halkyň arasyndaky däp bolan dost-doganlygy berkitmäge ýardam berýändigini bellediler. Dabara gatnaşyjylar türkmen topragynda bildirilen myhmansöýerlik, medeni çäräni ýokary derejede guramaga berlen goldaw üçin Türkmenistanyň Prezidenti Serdar Berdimuhamedowa çuňňur hoşallyk bildirdiler.
4. Türkmenistanda «Türkmenaragatnaşyk» agentligi tarapyndan guralýan «Sanly çözgüt – 2024» atly innowasion taslamalaryň bäsleşiginiň saýlama tapgyry dowam edýär. Bäsleşik kompýuter ylymlary we tehnologiýanyň innowasiýa usullary bilen meşgullanýan ýaşlary ýüze çykarmak hem-de olary höweslendirmek maksady bilen geçirilýär. Bäsleşik yglan edilen gününden bäri, ýurduň talyplarynyň we okuwçylarynyň, şeýle hem tehnologiki özgertmeler bilen gyzyklanýan höwesjeňleriň 300-den gowrak sanly taslamalary gelip gowuşdy.
5. 28-29-njy oktýabrda Aşgabat şäherinde Türkmenistanyň we Hytaý Halk Respublikasynyň degişli ministrlikleriniň we pudak edaralarynyň wekilleriniň gatnaşmagynda kiberhowpsuzlyk boýunça geňeşmeler geçirildi. Türkmenistanyň DIM-niň habar berşi ýaly, duşuşykda bilelikdäki işleriň netijelerine, şeýle hem Türkmenistanyň we HHR-iň hökümetleriniň arasynda halkara maglumat howpsuzlygy ulgamynda gazanylan ylalaşyklaryň ýerine ýetirilişine garaldy.
Dünýäde
6. Türkiýäniň «Baykar Defence» kompaniýasy we Gazagystan Respublikada taktiki uçarmansyz uçýan enjamlaryň önümçiligini guramak üçin ýol kartasyny düzmek barada ylalaşdylar. Stambulda geçirilen «SAHA EXPO-2024» atly halkara sergisiniň çäklerinde Gazagystanyň goranmak ministri Ruslan Žaksylykow bilen «Baykar Defence» kompaniýasynyň baş direktory Haluk Baýraktaryň arasynda bolan duşuşykda degişli ylalaşyklar gazanyldy.
7. Watikan 2025-nji ýylyň öňüsyrasynda anime görnüşindäki nyşany bilen tanyşdyrdy. Täze nyşan Luçe diýlip atlandyryldy (italýan dilinden terjime edilende «yşyk»). Ol Watikanyň resmi baýdagynyň reňkleri bilen sazlaşýan sary ýagyş donuny geýen ýaş gyz görnüşinde köpçülige tanyşdyryldy. Döredijiler jikme-jiklik aýratynlyklara uly üns beripdirler: palçyk syçran aýakgaplar jahankeşdäniň keşbini alamatlandyrýar, gahrymanyň gözleri bolsa keramatly Iakowyň ýoluna eýerýän zyýaratçylaryň adaty nyşany bolan ýalpyldawuk balykgulak gabyklary bilen bezelipdir. Boýnundaky zyýaratçy haçy onuň keşbiniň üstüni ýetirýär.
Sport täzelikleri
8. Türkmenistanyň Ýokary ligasynyň häzirki çempiony «Arkadag» futbol kluby AFK-nyň Çagyryş ligasynyň ikinji tapgyrynda Gyrgyz Respublikasynyň çempiony «Abdyş-Ata» topary bilen duşuşykda ýeňiş gazandy. Duşuşyk sişenbe güni Kuweýtde geçirildi we «Arkadagyň» 2:0 hasabynda ýeňşi bilen tamamlandy. Gollary Şamämmet Hydyrow (27-nji minutda) we Abdy Bäşimow (49-njy minutda) geçirdi. Bu ýeňiş netijesinde Wladimir Baýramowyň topary 6 utuk toplady we «B» toparçada birinji orna geçdi.
