BMGÖM we «Türkmenportal» Türkmenistanda Durnukly ösüş maksatlaryna ýetmäge gönükdirilen hyzmatdaşlygy giňeltdiler, Türkmenistanyň Senagatçylar we telekeçiler birleşmesiniň başlygy söwda toplumyna gözegçilik edýän wise-premýer wezipesine bellendi, Türkmenistanyň Prezidenti söwda we daşary ykdysady aragatnaşyklar ministrini wezipä belledi we beýleki habarlar
Türkmenistanda
1. Birleşen Milletler Guramasynyň Türkmenistandaky Ösüş maksatnamasy (BMGÖM) bilen «Türkmenportal» Durnukly ösüş maksatlaryny (DÖM) amala aşyrmak boýunça hyzmatdaşlygy pugtalandyrmak maksady bilen, 2024 – 2026-njy ýyllar üçin Özara düşünişmek hakynda Ähtnamany uzaltmak barada resminama gol çekdiler. Gol çekmek dabarasy Aşgabatda BMG-niň binasynda geçirildi.
2. Türkmenistanyň Senagatçylar we telekeçiler birleşmesiniň müdiriýetiniň başlygy Nökerguly Hojagulyýewiç Atagulyýew 6 aý synag möhleti bilen Türkmenistanyň Ministrler Kabinetiniň Başlygynyň söwda we dokma toplumyna gözegçilik edýän orunbasary wezipesine bellenildi. Ol özüne ynanylan wezipäni oňarmandygy üçin wezipesinden boşadylan Batyr Atdaýewiň ornuna bellenildi.
3. Prezident Serdar Berdimuhamedow Begenç Goçmollaýewi işde goýberen düýpli kemçilikleri üçin, Türkmenistanyň söwda we daşary ykdysady aragatnaşyklar ministri wezipesinden boşatdy. Bu wezipäni wagtlaýyn ýerine ýetirmek Türkmenistanyň söwda we daşary ykdysady aragatnaşyklar ministriniň orunbasary Kerimberdi Aýdogdyýewiç Gurbanowyň üstüne ýüklenildi.
4. 1-nji awgustdan Türkmenistanyň Daşary işler ministrliginiň düzüminde Daşary syýasy habarlar we sanly diplomatiýa departamenti işe başlady. Departamentiň esasy wezipesi döwrebap maglumat-kommunikasiýa tilsimatlary we jemgyýetçilik diplomatiýasy arkaly Türkmenistan barada dünýä jemgyýetçiliginiň habarlylygyny artdyrmakdan ybaratdyr. Daşary syýasat edarasynyň maglumat ugruny ösdürmegiň çäklerinde Türkmenistanyň daşary ýurtlardaky birnäçe ilçihanalarynda metbugat attaşesi wezipesini döretmek meýilleşdirilýär.
5. «Gorkut ata» atly IV halkara kinofestiwalda Özbegistanyň hem-de Türkmenistanyň kinematograflarynyň bilelikde surata düşüren «Magtymguly Pyragy» atly filmi «Iň gowy çeper film» baýragyna mynasyp boldy. Filmiň režissýory Muzaffarhon Erkinow hem-de filmde şahyryň kakasy Döwletmämmet Azadynyň keşbini janlandyran Türkmenistanyň halk artisti Çary Berdiýew festiwalyň baýragy – «Durna guşy» heýkeljigi bilen sylaglandylar.
6. Türkmenistanyň Ýaşlar baýragyna dalaşgärleri seçip almak işleri tamamlandy. Bilermenler topary dalaşgär görkezilen ýaşlaryň 506-syndan 135-sini saýlap aldy. Bäsleşik Magtymguly adyndaky Ýaşlar guramasynyň Merkezi geňeşi tarapyndan döwlet syýasatyny wagyz etmekde, bilimde, ylymda we beýleki pudaklarda üstünlik gazanan ýaş raýatlaryň arasynda guralýar. Seçip almak işlerine ýurduň ähli sebitlerinden, şol sanda Aşgabat we Arkadag şäherlerinden wekiller gatnaşdy.
7. «Türkmenaragatnaşyk» agentligi ýaşlaryň arasynda yglan edilen maglumat-telekommunikasiýa tehnologiýalary boýunça innowasion taslamalarynyň giň gerimli bäsleşiginiň jemlini jemledi. 2024-nji ýylyň 22-nji oktýabryndan 1-nji noýabry aralygynda geçirilen bäsleşige ýurduň öňdebaryjy bilim edaralarynyň, ugurdaş ministrlikleriň we pudaklaýyn dolandyryş edaralarynyň wekilleri gatnaşdy. Bilermen eminler topary ýedi ugur boýunça ýeňijileri kesgitledi.
Dünýäde
8. Almatyda gadymy daşa surat çekmek sungaty bilen tanyşmak üçin ajaýyp mümkinçilik peýda boldy. Şäheriň botanika bagynda ýurduň ilkinji petroglif seýilgähi ýerleşýär, bu ýerde zehinli ýerli suratkeşleriň döreden gadymy suratlarynyň ussatlyk bilen döredilen nusgalary görkezilýär. Ýaş gözlegçiler daşlara çekilen gadymy sahnalary höwes bilen öwrenýärler we çyzýarlar. Ýygyndy türki döwrüniň eserlerine aýratyn ähmiýet bermek bilen, Gazagystanyň dürli künjeklerinden petroglifleriň iň möhüm nusgalaryny öz içine alýar.
9. Parollary dolandyrmaga ýöriteleşen «NordPass» kompaniýasy ulanyjylaryň 2024-nji ýylda saýlan parollaryny giň gerimli öwrenmegiň netijelerini mälim etdi. Derňew adamlaryň köpüsiniň esasy sanly howpsuzlyk düzgünlerini henizem äsgermezlik edýändigini görkezdi. Gözleg parollaryň arasynda ýönekeý «123456» kombinasiýasynyň gürrüňsiz lider bolup galýandygyny ýüze çykardy. Iň giň ýaýran on sany parolyň arasynda: 12345678», «password», «qwerty123», «123123» bar. «NordPass» kompaniýasynyň hünärmenleri bu parollaryň islendik biriniň bir sekundyň içinde döwülip bilinjekdigini duýdurýarlar.
Sport täzelikleri
10. Aşgabatda adaty bolmadyk ýaýdan ok atmak ýaryşy geçirildi, oňa metbugat pudagynyň wekilleri – žurnalistler we meşhur blogerler gatnaşdy. Çäre bu gadymy sport görnüşini ýaşlaryň arasynda wagyz etmek maksady bilen, Türkmenistanyň Ýaý atyjylyk federasiýasy tarapyndan guraldy. Bu ýaryş metbugat işgärleriniň sport ukyplaryny görkezmek üçin meýdança boldy we türkmen halkynyň taryhy gadymy döwürlere uzaýan milli däplerini goramagyň ähmiýetini beýan etdi. Ýaryşda žurnalistler topary 2:1 hasabynda ýeňiş gazandy.
11. 27 ýaşly amerikaly bloger Jeýk Pol Arlingtonda (Tehas) geçirilen professional tutluşykda meşhur boksçy Maýk Taýsony ýeňdi. Tutluşyk her biri iki minutlyk meýilleşdirilen sekiz raund dowam etdi we ýeňiji eminleriň biragyzdan karary bilen kesgitlenildi.
