Türkmenistanyň Bilim ministrliginiň wekilleriniň Russiýa Federasiýasynyň Ylym we ýokary bilim ministriniň orunbasary Konstantin Mogilewskiý bilen duşuşygy boldy. Bilim ministrliginde guralan duşuşyk Ykdysady hyzmatdaşlyk boýunça hökümetara türkmen-rus toparynyň ýolbaşçylarynyň duşuşygyna gatnaşmak üçin gelen Russiýanyň wekiliýetiniň resmi saparynyň çäklerinde geçirildi. Duşuşyk ýokary bilim ugrundaky mundan beýleki hyzmatdaşlyga, tejribe alyşmaga we geljegi uly bilim taslamalaryny durmuşa geçirmäge bagyşlandy.
Türkmenistanyň Bilim ministirliginiň resmi saýtynda berilýän habara görä, taraplar iki ýurduň talyplary üçin täze mümkinçilikleri döretmekde möhüm ädim boljak bilelikdäki uniwersiteti döretmek baradaky başlangyç ýaly birnäçe möhüm meseleleri ara alyp maslahatlaşdylar.
Türkmen tarapy Russiýanyň talyplaryny 20 — 24-nji noýabr aralygynda Magtymguly adyndaky Türkmen döwlet uniwersitetinde himiýa ugry boýunça geçiriljek halkara ders bäsleşiklerine gatnaşmaga çagyrdy.
Mundan başga-da, wekiliýetler «Prioritet 2030», «Öňdebaryjy inženerçilik mekdepleri» we «Ylym we uniwersitetler» ýaly ýokary bilimde Russiýanyň maksatnamalaryny durmuşa geçirmekde tejribe alyşmak mümkinçiliklerini ara alyp maslahatlaşdylar. Türkmen hünärmenleriniň rus tejribesi bilen tanyşmaklary we öz milli zerurlyklaryna görä oňyn tejribeleri özleşdirmekleri üçin tanyşdyryş saparlaryny we bilim maslahatlaryny guramagyň ugurlary kesgitlendi.
Duşuşygyň ahyrynda taraplar bilim ulgamynda uzak möhletleýin we özara bähbitli hyzmatdaşlygy ösdürmäge bolan ymtylyşlaryny nygtadylar we Russiýa bilen Türkmenistanyň arasyndaky bilim gatnaşyklaryny goldamaga we ösdürmäge gönükdirilen täze başlangyçlary durmuşa geçirmäge taýýardyklaryny beýan etdiler.
