Türkmenistanyň Prezidenti pagta ýygymynyň depginini güýçlendirmegi tabşyrdy, türk kompaniýalary «Aşgabat-sitiniň» we Arkadag şäheriniň ikinji tapgyrynyň gurluşygyna gatnaşmak isleýär, Türkmenistanda Ermenistanyň Medeniýet günleri badalga aldy we beýleki habarlar
Türkmenistanda
1. Türkmenistanyň Prezidenti Serdar Berdimuhamedow wise-premýer T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Iş maslahatynda ýurduň oba hojalyk toplumynda alnyp barylýan işlere, Oba milli maksatnamasynyň ýerine ýetirilişi bilen baglanyşykly meselelere garaldy. Bellenilişi ýaly, häzirki wagtda sebitde ýetişdirilen pagta hasylyny ýitgisiz ýygnap almak boýunça zerur işler geçirilýär. Ýygnalan hasyl kabul ediş harmanhanalarynda, pagta arassalaýjy kärhanalarda bökdençsiz kabul edilýär. Şunda oba hojalyk tehnikalarynyň we gurallaryň netijeli peýdalanylmagyna aýratyn ähmiýet berilýär. Serdar Berdimuhamedow möwsümleýin oba hojalyk işleriniň, hususan-da, dowam edýän pagta ýygymynyň ýokary hilli we guramaçylykly ýerine ýetirilmegi babatda tabşyryklary berdi.
3. Türk gurluşyk kompaniýalary «akylly» Arkadag şäheriniň ikinji tapgyrynyň we «Aşgabat-siti» taslamasynyň gurluşygyna gatnaşmagy meýilleşdirýärler. Bu barada Türkiýäniň Türkmenistandaky ilçisi Ahmet Demirok Türkiýe Respublikasynyň Gününe bagyşlanan makalasynda mälim etdi. Onuň bellemegine görä, Türkmenistan Garaşsyzlygyny alandan bäri, türk kompaniýalary Türkmenistanda müňden gowrak taslamany üstünlikli tamamladylar. Häzirki wagtda türk kompaniýalary Türkmenistanda 4,4 milliard dollarlyk 19 taslamany durmuşa geçirýärler. «Biziň kompaniýalarymyza bildiren ynamy üçin Türkmenistanyň ýolbasçylaryna minnetdardyrys» diýip, türk diplomat belläp geçdi.
4. Türkmenistanyň Döwlet medeniýet merkeziniň Mukamlar köşgünde Ermenistan Respublikasynyň Medeniýet günleriniň açylyş dabarasy geçirildi. Konsertiň maksatnamasyna halk sazlary we aýdymlary, nusgawy, estrada sazlary, tans kompozisiýalary girizildi. Tomaşaçylar artistleriň çykyşlaryny şowhunly el çarpyşmalar bilen garşyladylar. Medeniýet günleriniň çäklerinde Aşgabadyň ýaşaýjylary üçin «Aşgabat» kinoteatrynda we «Watan» kinokonsert merkezinde kinofilmleriň görkezilişleri guraldy.
5. «Aşgabatda ermeni medeniýeti bilen tanydyrmak biziň üçin uly hormat. Özara Medeniýet günleriniň geçirilmeginiň dostlukly halklarymyzy has ýakynlaşdyrýan asylly däbe öwrülendigini nygtamak isleýärin. Türkmenistan bilen Ermenistanyň halklarynyň arasyndaky dostlugyň köp asyrlyk kökleri bar we häzirki wagtda hem ösmegini dowam etdirýär» diýip, Ermenistan Respublikasynyň bilim, ylym, medeniýet we sport ministriniň orunbasary Daniýel Daniýelýan Ermenistanyň Medeniýet günleriniň açylyş dabarasynda eden çykyşynda belledi.
6. Türkmenistanyň Bilim ministrliginde ýokary okuw mekdepleriniň we orta hünär okuw mekdepleriniň wekilleriniň gatnaşmagynda milli bilim ulgamynyň sanlaşdyrylmagynyň meselelerine bagyşlanan maslahat geçirildi. Maslahatyň gün tertibinde bilim edaralaryny we olaryň hyzmatlaryny birleşdirýän, ähli zerur maglumatlary we hyzmatlary bitewi penjire arkaly üpjün edýän «Sanly Bilim» atly sanly platforma tanyşdyryldy we jikme-jik ara alnyp maslahatlaşyldy. Çykyş edenler bilimiň sanlaşdyrylmagynyň döwlet syýasatynyň ileri tutulýan ugry bolup durýandygyny nygtadylar. Indiki tapgyrda «Sanly Bilim» atly bitewi ekoulgamyň çäklerinde bilim portallarynyň we hyzmatlarynyň ornaşdyrylmagyny tamamlamak, şeýle hem bilim edaralarynyň işgärlerini sanly gurallar bilen netijeli işlemek üçin taýýarlamak meýilleşdirilýär.
Dünýäde
7. Medison-awenýudaky Morgan kitaphanasynda we muzeýinde edilen täsin açyş aýdym-saz dünýäsini sarsdyrdy. Kurator Robinson Makklellan, meşhur Frederik Şopeniň ozal näbelli eserini tapdy. Gymmat bahaly tapyndy 24 taktdan ybarat owadan wals ýazylan, wagtyň geçmegi bilen saralyp giden nota sahypasydyr. Soňky şeýle açyşyň 50 ýyl mundan ozal edilendigini göz öňünde tutsak, bu açyş aýratyn möhümdir. Gysgalygyna, ýagny bary-ýogy 80 sekuntlyk sazdygyna garamazdan – wals doly tamamlanan eserdir we Şopeniň bu žanrda ýazan ozalky eserlerinden has gysgadyr.
8. 86 ýaşynda Mumbaýyň keselhanalarynyň birinde aradan çykan hindi işewüri Ratan Tata 91 million ýewrolyk uly baýlygynyň ep-esli bölegini özüniň Tito atly söýgüli nemes owçarkasyna galdyrmak kararyna geldi. Sallah we çagasyz bolansoň, ol baýlygynyň köp bölegini garyndaşlaryna däl-de, hyzmatkärine, aşpezine we söýgüli itine galdyrmagy ýüregine düwdi.
Sport täzelikleri
9. Ispaniýanyň milli ýygyndysynyň we Angliýanyň «Mançester Siti» toparynyň ýarym goragçysy Rodri «France Football» žurnalynyň möwsümiň iň gowy futbolçysyna gowşurýan abraýly «Altyn top» baýragyna mynasyp boldy. Dabara Pariž şäherinde geçirildi. Geçen möwsümde Rodri «Mançester Siti» bilen Angliýanyň çempiony boldy we Ispaniýanyň milli ýygyndysy bilen Ýewropa çempionatynda ýeňiji boldy. Şeýle hem dabarada futbol dünýäsiniň beýleki görnükli şahsyýetleriniň gazananlary bellenildi. Iň gowy tälimçi hökmünde Madridiň «Realyna» baştutanlyk edýän italiýaly Karlo Ançelotti iň gowy tälimçi diýlip ykrar edildi, argentinaly Emiliano Martines yzly-yzyna ikinji gezek iň gowy derwezeban diýlip ykrar edildi, hüjümçiler Garri Keýn we Kilian Mbappe iň gowy hüjümçä gowşurylýan baýragy paýlaşdylar, iň gowy ýaş oýunça berilýän baýraga Lamin Ýamal mynasyp boldy.
10. Erik ten Hag Angliýanyň «Mançester Ýunaýted» toparynyň baş tälimçi wezipesinden boşadyldy. Onuň orunbasary Rud wan Nistelroý wagtlaýyn baş tälimçi wezipesini ýerine ýetirer. Ten Hag 2022-nji ýylyň tomsundan bäri «MÝu-da» işledi. Geçen möwsümde «gyzyl şeýtanlar» Angliýanyň çempionatynda sekizinji orny eýeledi, bu 1990-njy ýyldan bäri toparyň iň pes netijesi boldy. Erik ten Hagyň ýolbaşçylygynda topar Angliýanyň Kubogyny we Angliýa ligasynyň kubogyny gazandy.
