HALKARA NEBIT WE GAZ UNIWERSITETI

2017/2018-nji okuw ýyly üçin hünärmenleri we bakalawrlary taýýarlamagyň aşakdaky ugurlary (hünärleri) boýunça talyplyga kabul edýändigini yglan edýär:

1. Geologiýa, gazylyp alynýan peýdaly magdanlary agtarmak, işläp geçmek (hünärler: nebit we gaz guýularyny burawlamak; nebitgazgeçirijilerini we nebitgazyň saklanýan ýerlerini taslamak, gurmak we ulanmak; ýerüsti dag işleri; gidrogeologiýa we inžener geologiýasy; geologiki kartalaşdyrma we magdan ýataklarynyň gözlegi; peýdaly magdanlary gözlemegiň we barlamagyň geofiziki usullary; dag etek we ýerasty meýdan çäklerini ölçemek; gazylyp alynýan peýdaly magdanlary baýlaşdyrmak; gazylyp alynýan peýdaly magdan känlerini özleşdirmek).

2. Himiýa tehnologiýasy (hünärler: nebiti, gazy gaýtadan işlemegiň himiki tehnologiýasy; daş töweregi goramak we tebigy baýlyklary tygşytly peýdalanmak).

3. Kompýuter tehnologiýasy (hünärler: maglumatlary işläp taýýarlamagyň we dolandyrmagyň awtomatlaşdyrylan ulgamlary; maglumat tehnologiýalarynyň programma üpjünçiligi).

4. Tehnologik maşynlar we enjamlar (hünär: sowadyjy, kompressor maşynlary we desgalary).

5. Energetika (hünärler: senagat desgalarynyň we tehnologiki toplumlaryň elektrohereketlendirilişi hem-de awtomatikasy; gazturbina desgalary we gazkompressor stansiýalary).

Tölegli esasda okadyljak hünärmenleri taýýarlamagyň ugurlary we hünärleri:

1. Geologiýa, gazylyp alynýan peýdaly magdanlary agtarmak, işläp geçmek (hünärler: nebit-gaz känlerini özleşdirmek we ulanmak; nebit-gaz geologiýasy).

2. Himiýa tehnologiýasy (hünär: standartlaşdyrmak we sertifikatlaşdyrmak).

3. Gurluşyk we binagärlik (hünär: nebit-gaz desgalary we senagat gurluşygy).

4. Tehnologik maşynlar we enjamlar (hünär: nebit, gaz känleriniň maşynlary we enjamlary).

5. Energetika (hünär: elektrik üpjünçiligi).

6. Pudak kärhanalarynyň ykdysadyýeti we dolandyrylyşy (hünär: nebit-gaz pudagynyň ykdysadyýeti we dolandyrylyşy).

Tölegli esasda iňlis dilinde okadyljak bakalawrlaryň taýýarlanylýan ugurlary (bakalawr üçin okuwyň möhleti 5 ýyl; 1 ýyl — dil taýýarlygy, 4 ýyl — hünär taýýarlygy):

1. Geologiýa, gazylyp alynýan peýdaly magdanlary agtarmak, işläp geçmek (taýýarlygyň ugurlary: nebitgaz işi; gazylyp alynýan peýdaly magdanlaryň geologiýasy we gözlegi).

2. Ykdysadyýet we dolandyryş (taýýarlygyň ugry: logistika (nebitgaz pudagynda)).

3. Himiýa we biotehnologiýalar (taýýarlygyň ugry: himiýa tehnologiýasy).

4. Informatika we hasaplaýyş tehnikasy (taýýarlygyň ugry: programma inženerligi).

Iňlis dilinde erkin gepleýän dalaşgärler giriş synaglaryny üstünlikli tabşyranlaryndan soňra taýýarlygyň nebitgaz işi; gazylyp alynýan peýdaly magdanlaryň geologiýasy we gözlegi; logistika (nebitgaz pudagynda) we himiýa tehnologiýasy ugurlary boýunça dil öwreniş bölüminde okuw taýýarlygyny geçmezden bakalawrlygyň 1-nji okuw ýylyna başlamak üçin iňlis dilinden barlag testini tabşyrýarlar.

Uniwersitete Türkmenistanyň umumy orta ýa-da orta hünär bilimli, ýaşy 35-den geçmedik raýatlary giriş synaglarynyň netijeleri boýunça bäsleşik esasynda kabul edilýär.

Resmi iş kagyzlary welaýat merkezlerinde we Aşgabat şäherinde 2017-nji ýylyň 10—26-njy iýuly aralygynda kabul edilýär.

Resmi iş kagyzlarynyň sanawy:

 — bellenilen nusgada rektoryň adyna ýazylan arza;

 — bellenilen nusgadaky sowalnama (anketa);

 — umumy orta (ýa-da orta hünär) bilim baradaky resminama (asyl nusgasy);

 — Türkmenistanyň Saglygy goraýyş we derman senagaty ministrligi tarapyndan bellenilen nusgadaky saglyk kepilnamasy;

 — soňky okan ýerinden (işlän ýerinden, harby bölümden) häsiýetnama;

 — 3x4 sm ölçegdäki sekiz sany fotosurat;

 — işleýänler üçin zähmet depderçesiniň tassyklanan göçürmesi;

 — giriş synaglaryndan üstünlikli geçen ýagdaýynda artykmaçlyklardan peýdalanýan okuwa girýän ýylynda mekdep okuwçylarynyň dersler boýunça döwlet bäsleşiginiň ýeňijileri, umumybilim dersleri boýunça halkara bäsleşiklerine gatnaşan Türkmenistanyň ýygyndy toparynyň agzalary şol ýagdaýlary tassyklaýan degişli resminamanyň asyl nusgasyny tabşyrýar.

Bulardan başga-da, okuwa girmäge isleg bildirýänler ýokarda görkezilen resminamalar bilen birlikde resminamalary kabul edýän iş toparyna aşakdakylary görkezýärler we nusgalaryny tabşyrýarlar:

 — şahsy pasportyny;

 — Türkmenistanyň Ýaragly Güýçlerinde harby gullugy geçenler harby şahadatnamasyny, harby gullugy geçmedik ýigitler ýazylyş şahadatnamasyny we ýaşaýan ýeri boýunça harby wekillikden güwähatyny.

Dalaşgär talyplyga kabul edilmek üçin artykmaç hukukdan peýdalanýandygyny tassyklaýan beýleki resminamalary görkezip biler.

Nädogry berlen maglumatlar we resmi iş kagyzlary üçin dalaşgär şahsy jogapkärçilik çekýär.

Giriş synaglary we okuwa kabul edilmek uniwersitetde (Aşgabat şäheri) aşakdaky möhletlerde geçirilýär:

Mary welaýaty — iýul aýynyň 30-31-i, awgust aýynyň 3-i we 5-i günleri

Lebap welaýaty — awgust aýynyň 1-2-si, 4-i we 6-sy günleri

Aşgabat şäheri — awgust aýynyň 7-8-i, 11-i we 13-i günleri

Ahal welaýaty — awgust aýynyň 9-10-y, 12-si we 14-i günleri

Balkan welaýaty — awgust aýynyň 15-16-sy, 19-y we 21-i günleri

Daşoguz welaýaty — awgust aýynyň 17-18-i, 20-si we 22-si günleri

Giriş synaglary aşakdaky dersler boýunça geçirilýär:

geologiýa, gazylyp alynýan peýdaly magdanlary agtarmak, işläp geçmek ugry — fizika, matematika, Türkmenistanyň taryhy;

himiýa tehnologiýasy ugry — himiýa, matematika, Türkmenistanyň taryhy;

kompýuter tehnologiýasy ugry — fizika, matematika, Türkmenistanyň taryhy;

nebit-gaz desgalary we senagat gurluşygy hünäri — fizika, matematika, Türkmenistanyň taryhy;

tehnologik maşynlar we enjamlar ugry — fizika, matematika, Türkmenistanyň taryhy;

energetika ugry — fizika, matematika, Türkmenistanyň taryhy;

nebit-gaz pudagynyň ykdysadyýeti we dolandyrylyşy hünäri — fizika, matematika, Türkmenistanyň taryhy;

tölegli esasda iňlis dilinde okadyljak bakalawrlaryň taýýarlanýan nebitgaz işi; gazylyp alynýan peýdaly magdanlaryň geologiýasy we gözlegi; logistika (nebitgaz pudagynda) we programma inženerligi taýýarlyk ugurlary — iňlis dili, matematika, Türkmenistanyň taryhy;

himiýa tehnologiýasy taýýarlyk ugry — iňlis dili, himiýa, Türkmenistanyň taryhy.

Dersler boýunça giriş synaglary Türkmenistanyň orta mekdepleriniň okuw maksatnamalarynyň esasynda geçirilýär.

Dersler boýunça giriş synaglary döwlet dilinde dilden geçirilýär.

Giriş synaglarynyň tertibinde bellenen wagtda synaga esassyz sebäplere görä gelip bilmedikler ýa-da dersleriň biri boýunça synagdan geçip bilmedikler ondan soňky synaglara goýberilmeýär.

Giriş synaglarynyň netijeleri boýunça deň mukdarda baha alanlardan talyplyga kabul edilmek üçin artykmaç hukukdan aşakda görkezilenler peýdalanýarlar:

 — saýlan hünäri boýunça 2 ýyldan az bolmadyk önümçilik tejribesi bolanlar;

 — çagyryş boýunça harby gullugy geçenler.

Halkara nebit we gaz uniwersitetiniň salgysy: Aşgabat ş., Arçabil şaýoly, 8; tel.: 39-13-74, 39-13-70.