Türkmenistanyň Prezidenti oba hojalygynyň meseleleri boýunça iş maslahatyny geçirdi, Türkmenistanyň we Russiýanyň Daşary işler ministrlikleriniň ýolbaşçylary telefon arkaly söhbetdeşlik geçirdi, Aşgabatda Ermenistanyň we Özbegistanyň täze ilçileri işe başlady we beýleki habarlar
Türkmenistanda
1. Türkmenistanyň Prezidenti Serdar Berdimuhamedow wise-premýer T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Iş maslahatynda ýurduň oba hojalyk toplumynda alnyp barylýan işlere hem-de Oba milli maksatnamasynyň ýerine ýetirilişi bilen baglanyşykly meselelere garaldy. Bellenilişi ýaly, häzirki wagtda welaýatlarda pagta hasylyny soňky hanasyna çenli ýygnap almak boýunça degişli işler geçirilýär. Şunuň bilen birlikde, geljek ýylyň hasyly üçin gowaça ekiljek meýdanlary ekiş möwsümine taýýarlamak üçin ýerleri mineral dökünler bilen iýmitlendirmek, sürüm işleri geçirilýär. Ýazky ekiş möwsüminde ulanyljak oba hojalyk tehnikalaryny we gurallary abatlamak hem-de bejermek boýunça zerur çäreler görülýär.
2. Türkmenistanyň daşary işler ministri Raşid Meredow bilen Russiýa Federasiýasynyň daşary işler ministri Sergeý Lawrow telefon arkaly söhbetdeşlikde türkmen-rus gün tertibiniň esasy taraplaryny ara alyp maslahatlaşdylar. Söhbetdeşligiň dowamynda taraplar özara gyzyklanma bildirilýän ugurlarda hyzmatdaşlygy ösdürmegiň mümkinçiliklerine garadylar hem-de Türkmenistanyň we Russiýanyň daşary syýasat edaralarynyň arasyndaky gatnaşyklary dowam etdirmegiň möhümdigini bellediler.
3. Duşenbe güni Türkmenistanyň daşary işler ministri Raşid Meredow Ermenistanyň täze ilçisi Arsen Awagýandan ynanç hatynyň nusgasyny kabul etdi. Duşuşykda taraplar Türkmenistan bilen Ermenistanyň arasyndaky syýasy-diplomatik, söwda-ykdysady, medeni-ynsanperwer ulgamlar boýunça hyzmatdaşlygyň esasy ugurlaryny ara alyp maslahatlaşdylar. Olary mundan beýläk-de ösdürmek barada özara pikir alyşyldy. Mundan başga-da, taraplar söwda-ykdysady gatnaşyklary ösdürmegiň meselelerini ara alyp maslahatlaşdylar, ulag we energetika pudagyndaky hyzmatdaşlyk içgin ara alnyp maslahatlaşyldy.
4. Türkmenistanyň Daşary işler ministrliginiň ýolbaşçysy Raşid Meredow Özbegistanyň täze ilçisi Rawşanbek Alimow bilen duşuşdy. Duşuşykda taraplar sebitleýin we ählumumy gün tertibiniň möhüm ugurlary boýunça çemeleşmeleriniň meňzeşdigini, şeýle hem söwda-ykdysady gatnaşyklaryň we Türkmenistan bilen Özbegistanyň arasyndaky ynsanperwer hyzmatdaşlygyň üstünlikli ösdürilýändigini bellediler.
5. Türkiýäniň söwda ministri Ömer Bolat resmi sapar bilen Türkmenistana geler. Türk ministri saparynyň dowamynda 4 — 6-njy dekabr günleri Türkmenistanyň Söwda-senagat edarasynda geçiriljek Türkiýäniň eksport harytlarynyň sergisine baryp görer. Mundan başga-da, Ömer Bolat Türkmenistanyň Prezidenti Serdar Berdimuhamedow we söwda toplumyna gözegçilik edýän wise-premýer Nökerguly Atagulyýew bilen duşuşar.
6. Belarus Respublikasynyň Prezidenti Aleksandr Lukaşenko Stanislaw Çepurnoýy ýurduň Türkmenistandaky täze ilçisi wezipesine belledi. Stanislaw Çepurnoý şu wagta çenli Belarus Respublikasynyň Ministrler Geňeşiniň dolandyryş edarasynyň halkara hyzmatdaşlygy we söwda bölüminiň müdiri bolup işledi. Ol bu diplomatik wezipede Belarus Respublikasynyň Türkmenistandaky ilçisiniň wezipesini 2019-njy ýyldan bäri ýerine ýetiren Wýaçeslaw Beskostyýnyň ornuna bellenildi.
Dünýäde
7. Owganystanda TOPH gaz geçirijisiniň taslamasynyň owgan tapgyryny durmuşa geçirmek üçin amaly işler başlandy. Taslamany durmuşa geçirmek üçin zerur tehniki enjamlar Owganystan bilen Türkmenistanyň serhetýaka sebitine getirildi. Maglumatlara görä, TOPH taslamasy tamamlanandan soň 12 müň owgan raýaty iş bilen üpjün ediler we bu taslamany durmuşa geçirmekden ýurduň ýyllyk girdejisi takmynan bir milliard dollar bolar.
8. NASA kosmos agentligi planetamyza iki sany iri, howply bolup biljek asteroidiň ýakynlaşýandygyny habar berdi. Bu kosmos jisimleriniň 3-nji we 4-nji dekabrda Ýeriň golaýyndan geçmegine garaşylýar. Asteroidleriň ölçegleri 402 we 387 metr bolup, bu Nýu-Ýorkuň meşhur diňi bolan Empaýr-steýt-bilding binasynyň beýikligi bilen deňdir. Hünärmenleriň hasaplamalaryna görä, asteroidleriň biri Ýeriň takmynan iki million kilometr, ikinjisi bolsa bäş ýarym million kilometr golaýyndan geçer.
Sport habarlary
9. 3x3 basketbol boýunça Türkmenistanyň erkekler ýygyndysy 7-8-nji dekabr aralygynda Kaluga şäherinde geçiriljek Bitewi Kontinental liganyň Superfinalyna gatnaşar. Bäsleşige Russiýadan, Belarusdan, Gazagystandan, Gyrgyzystandan, Türkmenistandan, Serbiýadan, Türkiýeden we Fransiýadan 12 erkekler we 8 zenanlar toparlary gatnaşar. Bije çekişligiň netijelerine görä, türkmen basketbolçylary Gyrgyzystanyň ýygyndysy we Moskwanyň «Runa» topary bilen bilelikde «C» toparça düşdi.
10. «Arkadag» toparynyň ýarym goragçysy Şanazar Tirkişow Türkmenistanyň Ýokary ligasynyň noýabr aýynyň iň gowy oýunçysy diýlip ykrar edildi. Noýabr aýynda 27 ýaşly futbolçy üç oýunda dört gol salmagy başardy. Tirkişow şu möwsümde «Arkadag» topary üçin garşydaşlarynyň derwezesine 14 gol saldy we Ýokary liganyň bombardirler sanawynyň bäşinji ornunda ýerleşýär. Birinji ýerde 30 gol bilen Didar Durdyýew barýar
