«Altyn Asyr» futbol kluby öz meýdançasynda AFK-nyň 2-nji Çempionlar ligasynyň 5-nji tapgyrynyň duşuşygynda Yragyň «Eýr Fors» toparyndan ýeňlişe sezewar boldy. Aşgabatda geçen oýun 2:0 hasabynda myhmanlaryň peýdasyna tamamlandy. 7-nji minutda «Altyn Asyr» klubynyň goragçysy Ahmet Ataýew topy öz derwezesine goýberdi, 31-nji minutda bolsa myhmanlaryň ýarym hüjümçisi Hiran Ahmet ikinji goly geçirmek bilen, öz toparynyň artykmaçlygyny artdyrdy.
Mälim bolşy ýaly, 2024/25 möwsüminden başlap, Aziýanyň Futbol Konfederasiýasy yklymda geçirilýän klub ýaryşlaryny täzeden gurady. Şunda ol üç täze ýaryş gurady: reýtinge görä iň güýçli klublar üçin naýbaşy Çempionlar ligasy, ähmiýeti boýunça ikinji derejeli ýaryş – Çempionlar ligasy AFK-2 we iň pes derejeli ýaryş – AFK-nyň Çagyryş ligasy.
Türkmenistanyň wise-çempiony «Altyn Asyr» degişli ygtyýarnama eýe bolandan soň, ozal bar bolan AFK Kubogyna meňzeş bolan Çempionlar ligasy AFK-2 ýaryşyna goşuldy. «Türkmenaragatnaşyk» agentliginiň topary 2018-nji ýylda şol ýaryşyň finalyna çykmagy başarypdy. Ýazguly Hojageldiýewiň ýolbaşçylygyndaky topar başlangyç tapgyrda Hindistanyň «Ist Bengal» klubyny myhmançylykda 3:2 hasaby bilen ýeňip, Çempionlar ligasy AFK-2 ýaryşynda Türkmenistana wekilçilik etmäge hukuk gazanypdy.
Çempionlar ligasy AFK-2 geografiki ýerleşişi boýunça Günbatar we Gündogar zolaklara bölünen 32 topar gatnaşýar. «Altyn Asyr» «B» toparynda oýnamak bilen, onda Saud Arabystanynyň «Al-Taawun» (12 utuk), Bahreýniň «Al-Halidiýa» we Yragyň «Eýr Fors» (her birinde 9 utuk) klublary 1/8 finalyň iki ýollanmasyny gazanmak ugrunda göreş alyp barýar. «Altyn Asyr» klubynyň hiç hili utugy ýok we ýaryş tertibiniň iň soňky setirinde ýerleşýär. Indiki tapgyrda «aragatnaşykçylar» 4-nji dekabrda Bahreýniň «Al-Halydiýa» kluby bilen myhmançylykda duşuşar.
