«Ozon» onlaýn söwda platformasy Türkmenistanyň bazaryna girmegi meýilleşdirýär, Türkmenistan we Beýik Britaniýa bilim ulgamynda hyzmatdaşlygy pugtalandyrýarlar, türkmen tennisçi gyzlary «Ashgabat Open 2024-de» hormat münberiniň ähli basgançaklaryny eýelärler we beýleki habarlar
Türkmenistanda
1. GDA-nyň iň iri onlaýn söwda platformalarynyň biri bolan Russiýanyň «Ozon» kompaniýasy Türkmenistanda satuwlary ýola goýmak barada gepleşikleri geçirýär. Bu barada kompaniýanyň metbugat sekretary Kristina Topalowa «Türkmentel – 2024» halkara sergisinde habar berdi. Kompaniýanyň wekiliniň bellemegine görä, söwda platformasynda dürli ugurlar boýunça 370 milliondan gowrak önüm hödürlenýär. Häzirki wagtda «Ozon» on ýurtda işleýär we Türkmenistany täsirini giňeltmek üçin geljegi uly bazar hökmünde görýär.
2. Türkmenistanyň Bilim ministrliginde ministriň orunbasary Azat Ataýew we Gündogar Ýewropa we Merkezi Aziýa sebiti boýunça eksport müdiri Sara Çijiniň arasynda duşuşyk geçirildi. Taraplar bilim ulgamynda hyzmatdaşlygy giňeltmegiň mümkinçiliklerini ara alyp maslahatlaşdylar. Türkmen bilim edaralaryny akkreditasiýa etmegiň mümkinçilikleri, şeýle hem 2025-nji ýylda Türkmen-britan söwda-senagat geňeşiniň mejlisini geçirmek meselesi ara alnyp maslahatlaşyldy.
3. Türkmenistanyň Russiýa Federasiýasyndaky ilçisi Esen Aýdogdyýew Ýewraziýa we Afrika halklarynyň Assambleýasynyň Baş geňeşiniň başlygy Swetlana Smirnowa bilen duşuşdy. Gepleşikleriň dowamynda Ýewraziýa we Afrika ýurtlary bilen Türkmenistanyň işewür düzümleriniň, ýokary okuw mekdepleriniň we ylmy merkezleriniň arasynda hyzmatdaşlygyň meseleleri ara alnyp maslahatlaşyldy. Türkmenistanda Ýewraziýa halklarynyň Assambleýasynyň günlerini geçirmegiň mümkinçiligine hem garaldy.
4. «Türkmenaragatnaşyk» agentliginiň başlygy Hajymyrat Hudaýgulyýew «Turkmentel-2024» atly halkara maslahatynda çykyş edip, ýurduň ösüşi üçin sanlylaşdyrmanyň we kiberhowpsuzlygyň ähmiýetini nygtady. Öz çykyşynda ol sanly tehnologiýalaryň bilimden başlap, saglygy goraýyş ulgamyna çenli durmuşyň ähli ugurlaryny özgerdýändigini we akylly şäherleriň hem-de netijeli senagatyň döredilmegi üçin esas bolup durýandygyny belledi. Hudaýgulyýew geçen ýyl Türkmenistanyň ilkinji «akylly» şäheri bolan we eýýäm halkara derejesinde ykrar edilen Arkadag şäheriniň açylandygyny ýatlatdy. Şeýle hem ol tutuş ýurt boýunça ýokary tizlikli internetiň giňeldilmegi we 5G tehnologiýalarynyň ornaşdyrylmagy boýunça meýilnamalaryň bardygy barada gürrüň berdi. Sanly tehnologiýalar babatda hünärmenleri taýýarlamak hem möhüm ugra öwrüldi. Ýurtda orta mekdepleriň okuwçylary we ýokary okuw mekdepleriniň talyplary üçin IT-bäsleşikleri we startap maksatnamalary geçirilýär. Mundan başga-da, milli derejede kiberhowpsuzlygy üpjün etmeklige uly üns berilýär.
5. Aşgabatda çekirtgelere garşy göreşmek taslamasynyň hünärmenleriniň ýyllyk tehniki maslahaty geçirildi. Taslama BMG-niň Azyk we oba hojalygy guramasynyň Kawkazda we Merkezi Aziýada çekirtgelere garşy göreşi gowulandyrmak maksatnamasynyň bir bölegidir. Taslama 2011-nji ýyldan bäri hereket edýär we Türkmenistanyň goşulan häzirki tapgyry Ýaponiýanyň Hökümetiniň maliýe taýdan goldaw bermeginde amala aşyrylýar. Taslamany guraýjylar gamyş jeňňelliklerini bio we himiki pestisidler bilen işläp bejermek üçin meýdan we laboratoriýa enjamlary, ulaglar we motorly gaýyklar, pürküji enjamlar bilen üpjün edýärler. Şol bir wagtyň özünde, okuw sapaklarynyň we meýdan işleriniň dowamynda zyýankeş mör-möjeklere garşy göreşmegiň häzirki zaman usullary ösdürilýär.
Dünýäde
6. Gazagystan Respublikasynyň Syýahatçylyk we sport ministrligi 16-njy noýabrdan iki ýurduň arasynda hereket edip başlajak özboluşly «Ýüpek ýoly» demir ýol syýahatynyň ýola goýlandygyny habar berdi. Dört günlük ugur Almaty, Türküstan we Daşkent şäherleriniň üstünden geçip, syýahatçylara iki döwletiň baý taryhy we medeni mirasy bilen tanyşmaga mümkinçilik berýär. Syýahat maksatnamasy sebitiň gözel ýerlerine baryp görmegi öz içine alýar.
7. Hindistanyň Goranmak ministrligi ilkinji harby kosmos türgenleşiginiň geçirilendigini habar berdi. Üç günlük türgenleşik kosmos infrastrukturasynyň mümkinçiliklerine hemmetaraplaýyn baha bermek we orbital ulgamlarda näsazlyklar dörän halatynda ýüze çykyp biljek töwekgelçilikleri kesgitlemek üçin guraldy. Dürli gurluşlaryň kosmos tehnologiýalaryna garaşlylygynyň derňewine aýratyn üns berildi. Ady «Ýeriň ýokarsyndaky asmanda türgenleşik» diýlip terjime edilýän bu türgenleşige Hindistanyň Goranmak kosmos agentliginiň hünärmenleri we ähli goşun görnüşleriniň wekilleri gatnaşdylar. Maksatnamanyň çäklerinde ýurduň innowasion kosmos işläp taýýarlamalary we häzirki kosmos taslamalary ara alnyp maslahatlaşyldy.
Sport täzelikleri
8. Türkmen tennisçileri Türkmenistanyň paýtagtynda geçirilýän «Ashgabat Open 2024» halkara ýaryşynda uly üstünlik gazandylar. Nobatdaky oýun gününiň netijelerine görä, gyzlaryň arasynda geçirilen ýekelikdäki ýaryşdan soň hormat münberiniň ähli basgançaklaryny diňe ýerli türgenleriň eýelejekdigi belli boldy. Türkmenistanyň sekiz wekili ýaryşyň çärýek finalynda çykyş etdi: Ilima Guseýnowa, Aýlara Kakabaýewa, Aýnur Annamyradowa, Näzli Hudaýgulyýewa we Sülgün Işangulyýewa ilkinji bäş orny eýelediler, şeýle hem olaryň arasynda Safiýa Tribunskaýa, Jennet Orazalyýewa we Anna Ponýatowa bar. Bu halkara ýaryşa 12 ýurtdan türgenleriň, şol sanda Beýik Britaniýa we Hindistan ýaly ösen tennis däpleri bolan ýurtlaryň wekilleriniň hem gatnaşýandygyny göz öňünde tutsak, türkmen tennisçileriniň gazanan üstünlikleri aýratyn bellärliklidir. Indi janköýerler hormat münberdäki ýerleriň paýlanyşyny kesgitlejek watandaşlarynyň arasyndaky gyzykly oýunlara tomaşa ederler.
