Dünýäde iň uzyn boýly we iň kelte boýly zenanlar duşuşdylar. Türkiýeli web-dizaýnçy we hindistanly aktrisa-bloger çaý başynda söhbet etdiler diýip, «Guinness World Records» saýtyna salgylanýan «rg.ru» ýazýar.
Türkiýeli Rumeýsa Gelji bu gün dünýäde iň uzyn boýly zenandyr, 27 ýaşly gyzyň boýy 215,16 santimetre deň. Onda bedeniň çalt ösmegine we süňkleriň bozulmasyna getirýän Uiweriň sindromy keseli hasaba alyndy.
Dünýäde iň gysga boýly zenan Hindistandan 30 ýaşly Joti Amjidir, boýy 62,8 sm bolan bu zenan ahondroplaziýa (süňkleriň ösüşiniň bozulmasy) keselinden ejir çekýär.
Boýlaryndaky 152,36 sm tapawuda garamazdan, zenanlaryň tiz jora bolandyklary, durmuş tejribelerini paýlaşandyklary habarda bellenýär. Olaryň gyzyklanýan zatlary-da meňzeş ekeni, ikisi-de modany, ýüz idegini we bezeg şaýlaryny dakynmagy halaýarlar.
